Noyabrın 6-da Bakı Şəhər Mədəniyyət Baş İdarəsinin təşkilatçılığı ilə Suraxanı rayon Heydər Əliyev Mərkəzində 8 Noyabr - Zəfər Günü münasibətilə “Zəfər salnaməmiz” adlı tədbir keçirilib.

Tədbirdə rəsmilər, şəhid ailələri, qazilər, veteranlar, FHN-nin Akademiyasının zabit və  kursantları, idarə, müəssisə və təşkilatların rəhbərləri, rayon ictimaiyyət   nümayəndələri iştirak ediblər.

Əvvəlcə Azərbaycan Respublikasının Dövlət Himni səsləndirilib, Vətən uğrunda canlarından keçən qəhrəman şəhidlərimizin əziz xatirəsi bir dəqiqəlik sükutla ehtiramla anılıb.

Çıxış edənlər bildiriblər ki, 2020-ci ilin sentyabrın 27-dən başlayan, 44 gün davam edən və işğal altındakı ərazilərimizin qaytarılması ilə nəticələnən Vətən Müharibəsi tariximizin ən parlaq səhifəsinə, Azərbaycan xalqının iftixar və qürur mənbəyinə çevrilib.

Tədbirin bədii hissəsində 3 nömrəli Uşaq - Gənclər İnkişaf Mərkəzinin şagirdlərinin ifasında Vətən müharibəsinə həsr olunmuş bədii kompozisiya, Azərbaycanın Milli Qəhrəmanı Cavanşir Rəhimov adına 146 nömrəli məktəbin müəllim və şagirdlərinin  ifasında “Zəfər nəğməsi” mahnısı səsləndirilib, rəqslər nümayiş olunub.