Mayın 14-də Suraxanı və Qaradağ rayon Heydər Əliyev Mərkəzlərinin birgə təşkilatçılığı ilə 18 May-Beynəlxalq Muzeylər Gününə həsr edilmiş “Muzeylərdə yaşayan dəyərlər” adlı tədbir keçirilib.

Tədbirdə mədəniyyət işçiləri, Suraxanı rayon idarə və müəssisələrin rəhbər və işçi heyəti, şagirdlər iştirak ediblər.

Tədbir Azərbaycan Respublikasının Dövlət Himninin səslənməsi ilə başlanıb. Daha sonra muzeylərin inkişaf yolu mövzusunda videoçarx nümayiş olunub.

Suraxanı rayon Heydər Əliyev Mərkəzinin direktoru Xəyalə Mahmudova, Qaradağ rayon Heydər Əliyev Mərkəzinin direktoru Çərkəz Əliyeva, Müharibə, Əmək və Silahlı Qüvvələr Veteranlar təşkilatı Suraxanı rayon şöbəsinin sədri Eldar Rüstəmov çıxş edərək bildiriblər ki, muzeylər keçmişlə bu gün arasında mənəvi körpü rolunu oynayaraq milli yaddaşımızı yaşadır. Nümayiş olunan hər bir eksponat xalqımızın həyat tərzini, adət-ənənələrini və tarixi yolunu özündə əks etdirir. Bu dəyərlərin qorunması və təbliği milli-mədəni irsimizin yaşadılması baxımından mühüm əhəmiyyət daşıyır.

Bədii hissədə 36 nömrəli Uşaq Musiqi Məktəbinin və Gülarə Əliyeva adına 3 nömrəli Uşaq İncəsənət Məktəbinin müəllim və şagirdlərinin ifasında xalq və bəstəkar mahnıları səsləndirilib, rəqslər nümayiş olunub.

Sonda iştirakçılar Ümummilli Lider Heydər Əliyevin zəngin irsini əks etdirən ekspozisiya və Heydər Əliyevin mədəniyyətlə bağlı fotoşəkillərindən ibarət sərgi ilə tanış olublar.