Rusiyanın Yekaterinburq şəhərində Rusiya Azərbaycanlı Gənclər Birliyinin təşkilatçılığı ilə “Taleyin zəngi” adlı musiqili tamaşa nümayiş etdirilib.

AZƏRTAC xəbər verir ki, Ural Dövlət Mədən Universitetində təqdim olunan tamaşa bir telefon zənginin insanın həyatında necə dönüş nöqtəsinə çevrilə biləcəyindən bəhs edir.

Mədəni və humanitar əlaqələrin inkişafına həsr olunan tədbirdə Rusiya və Azərbaycanın ictimai-siyasi xadimləri, o cümlədən yerli azərbaycanlı icmanın üzvləri iştirak ediblər.

Tamaşadan əvvəl çıxış edən Azərbaycanın Yekaterinburqdakı baş konsulu vəzifəsini icra edən Şöhrət Mustafayev, Rusiya Azərbaycanlı Gənclər Birliyinin Sverdlovsk regional bölməsinin rəhbəri Toğrul Həsənzadə və digərləri vurğulayıblar ki, bu kimi mədəni təşəbbüslər gənclər arasında əlaqələrin möhkəmlənməsinə, xalqlar arasında dostluğun dərinləşməsinə və mədəniyyətlərarası dialoqun təşviqinə xidmət edir.

Tamaşanın təşkilatçısı Mutvalı Şıxlinski bildirib ki, “Taleyin zəngi” layihəsi çərçivəsində musiqi, rəqs və səhnəciklər vasitəsilə Azərbaycan mədəniyyətinin zənginliyi tamaşaçılara təqdim edilib.

Səhnələşdirilən əsərin ssenari müəllifi Fəridə Boyliyevadır. Əsas rolları Aqşin Şıxlinski və Nuray Ağababayeva ifa ediblər. Aktrisa Nuray Ağababayeva öz obrazı barədə danışaraq bildirib ki, qəhrəmanı xəyalpərəst, məqsədli və dünyaya açıq bir insandır: “Mənim qəhrəmanım taleyə inanır və bu baxımdan mənimlə çox oxşardır”.

“Azərbaycan-Ural” Milli-Mədəni Təşkilatının dəstəyi ilə hazırlanan tamaşada ailə, dostluq və sevgi mövzularına da toxunulub. Musiqili nömrələr və rəqslər Azərbaycan xalqının qədim adət-ənənələrini əks etdirərək, tarixlə müasirliyin sintezini yaradıb.

Rusiya Dövlət Dumasının deputatı Sergey Çepikov tamaşa ilə bağlı təəssüratlarını bölüşüb: “Tamaşa yüksək səviyyədə təqdim olundu, zal dolu idi. Gənclər çox peşəkar çıxış etdilər və bu, Rusiya ilə Azərbaycan arasında dostluğa gözəl töhfədir”.

“Taleyin zəngi” musiqili tamaşası tamaşaçılar tərəfindən böyük maraqla qarşılanıb.

Fəridə Abdullayeva

AZƏRTAC-ın xüsusi müxbiri

Yekaterinburq