Heydər Əliyev Mərkəzində Azərbaycan Respublikası Mədəniyyət Nazirliyi, İnnovasiya və Rəqəmsal İnkişaf Agentliyi, Kiçik və Orta Biznesin İnkişafı Agentliyi və Yaradıcı Mərkəzin təşkilatçılığı ilə “Yaradıcı Azərbaycan” (10-12 mart) layihəsi çərçivəsində “Gametech - oyun texnologiyaları” və “CulTech - mədəniyyət sahəsində startaplar”a dair dəyirmi masalar təşkil edilib. Dəyirmi masalar yaradıcı sənayelər, oyun ekosistemi və mədəniyyət sahəsində fəaliyyət göstərən startaplar, investorlar və dövlət qurumları arasında əməkdaşlığın gücləndirilməsinə yönəlib.

Açılış nitqi ilə çıxış edən Mədəniyyət Nazirliyinin Yaradıcı sənayelər və rəqəmsal inkişaf şöbəsinin müdiri Rəşad Əzizov hər iki sektorun sürətlə inkişaf etdiyini və startap ekosisteminin dəstəklənməsinin vacibliyini vurğulayıb.

Tədbirlər çərçivəsində oyun və mədəniyyət startapları üçün yeni imkanlar, qrant proqramları, texnoloji infrastrukturun gücləndirilməsi, beynəlxalq tədbirlərdə iştirak və investisiya imkanları kimi mövzular müzakirə olunub. İştirakçılara “GameTech” və “CulTech” sektorlarının inkişaf perspektivləri, ötən il görülən işlərin statistikası və gələcək planlar barədə təqdimatlar edilib.

Dəyirmi masalar hər iki sahədə innovativ təşəbbüslərin dəstəklənməsi və sektorların inkişafı üçün vacib platformaya çevrilərək, iştirakçılar arasında fikir mübadiləsi və gələcək əməkdaşlıqlar üçün zəmin yaradıb.