Bakı Şəhər Mədəniyyət Baş İdarəsinin tabeliyində olan Yasamal rayon Heydər Əliyev Mərkəzi və Bakı Şəhər Gənclər və İdman İdarəsinin Yasamal rayonu üzrə gənclər və idman sektorunun təşkilatçılığı ilə Xocalı faciəsinin 33-cü ildönümünə həsr olunan “Xocalı-yeni tarixi izlərlə” adlı sərgi-tədbir keçirilib.

Tədbirdə ziyalılar, 53, 21, 158 və 52 nömrəli tam orta məktəblərin müəllim və şagird kollektivi  iştirak ediblər.

İlk öncə tədbir iştirakçıları Mərkəzin foyesində “Xocalı-yeni tarixi izlərlə” adlı sərgi ilə tanış olublar. Sərgidə çəkilən rəsmlərdə şagirdlərin erməni vandalizminin törətdikləri vəhşilikləri təsvir etmələri yüksək qiymətləndirilib, onlara uğurlar arzulanıb.

Sonra Xocalı soyqırımı qurbanlarının xatirəsi bir dəqiqəlik sükutla yad olunub.

Tədbirdə çıxış edənlər qeyd ediblər ki, Azərbaycan xalqının Ümummilli Lideri Heydər Əliyevin təşəbbüsü ilə 1994-cü ildə Azərbaycan Respublikasının Milli Məclisi tərəfindən Xocalı soyqırımına ilk siyasi-hüquqi qiymət verilib və 26 fevral tarixi Xocalı Soyqırımı Günü kimi elan olunub. Bu gün Xocalı faciəsində həlak olan şəhidlərimizin ruhu şaddır. Artıq Xocalıda üçrəngli bayrağımız dalğalanır, şəhidlərimizin qisası düşməndən alınıb.

Sonda  Xocalı faciəsinin tarixi həqiqətlərini əks etdirən videoçarx nümayiş olunub və rəsm sərgisində fəal iştiraklarına görə məktəblilərə  Bakı Şəhər Gənclər və İdman İdarəsi tərəfindən təşəkkürnamələr təqdim edilib.