Tanınmış nasir, dramaturq, ssenarist və rejissor, Azərbaycan Respublikası Prezidentinin fərdi təqaüdçüsü, Dövlət mükafatları laureatı, Əməkdar incəsənət xadimi, Xalq yazıçısı, “Şöhrət” ordenli Rüstəm İbrahimbəyovun anadan olmasının 86 ili tamam olur.

Rüstəm İbrahimbəyov müasir Azərbaycan ədəbiyyatının və kinematoqrafiyasının görkəmli simalarındandır. Sənətkarın sosial-mənəvi problemləri, dramatik konfliktləri əks etdirən povestləri və hekayələri, pyesləri və ssenariləri ədəbiyyatımızın və milli kino sənətinin məzmunca yeniləşməsində əhəmiyyətli rol oynayıb. Onun əsərləri əsasında 40-dan çox bədii və televiziya filmləri çəkilib. Rüstəm İbrahimbəyovun ssenarist və rejissor olaraq kinematoqrafiyanın inkişafında da təqdirəlayiq xidmətləri vardır. Yazıçının ssenariləri əsasında çəkilən “Bir cənub şəhərində”, “Səhranın bəyaz günəşi”, “İstintaq”, “Ad günü” və bir çox digər filmlər geniş şöhrət tapmış, yüksək mükafatlarla təltif edilib. Onun həmmüəllif ssenaristi olduğu “Urqa” filmi Venesiya Beynəlxalq Kinofestivalının ali mükafatına, “Günəşdən usanmışlar” filmi isə Kann Beynəlxalq Kinofestivalının ali mükafatına və Amerika Kino Akademiyasının “Oskar” mükafatına layiq görülüb.

Rüstəm İbrahimbəyov bədii yaradıcılıqla yanaşı, eyni zamanda ictimai fəaliyyət göstərib.

Görkəmli yazıçı və kino xadimi Rüstəm İbrahimbəyov 2022-ci ildə vəfat edib.