Oktyabrın 28-də Bakı Şəhər Mədəniyyət Baş İdarəsinin tabeliyində olan Səbail rayon Mərkəzləşdirilmiş Kitabxana Sisteminin Mərkəzi Kitabxanasında Azərbaycanın Xalq şairi, ictimai xadim, Dövlət mükafatları laureatı Nəbi Xəzrinin anadan olmasının 100 illik yubileyinə həsr olunan şeir müsabiqəsinin təltifolunma mərasimi keçirilib.

Oxucular arasında mütaliənin təbliği, kitabxanalara ictimai marağın artırılması, istedadlı uşaqları aşkarlamaq, uşaq və gənclərdə müasir Azərbaycan və dünya ədəbiyyatına marağı artırmaq məqsədi ilə keçirilən şeir müsabiqəsinə oktyabr ayında start verilib və kitabxanaların oxucuları olan istedadlı şagirdlər seçilərək müsabiqədə iştirak ediblər.

Müsabiqənin seçim turunda iştirak edən münsiflər heyətinin üzvləri C.Cabbarlının ev muzeyinin direktoru Qəmər Bağırova, Cəlil Məmmədquluzadənin ev muzeyinin böyük elmi işçisi Yeganə Məmmədova, Suraxanı rayon Heydər Əliyev Mərkəzinin kiçik elmi işçisi Firəngiz Məlikbəyli olub.

Müsabiqə iştirakçıları Baş İdarənin Fəxri Fərmanı, münsiflər heyətinin ümumi qərarına əsasən fərqlənən qaliblər isə eyni dərəcəli Diplomla təltif olunublar.

Təltifolunma mərasimində iştirak edən Nəbi Xəzrinin oğlu Arzu Babayev sonda çıxış edərək, müsabiqə təşkilatçılarına öz minnətdarlığını bildirib.