Azərbaycan Respublikası Prezidentinin İşlər İdarəsinin Prezident Kitabxanasında Xalq şairi Bəxtiyar Vahabzadənin anadan olmasının 100 illiyi münasibətilə hazırlanan “Hikmət mücrüsü” kitabının təqdimatı keçirilib.

AZƏRTAC xəbər verir ki, təqdimatdan əvvəl Xalq şairi haqqında videoçarx nümayiş olunub və onun yaradıcılığına həsr edilmiş virtual sərgi təqdim edilib.

Tədbirdə çıxış edən Prezident Kitabxanasının direktoru, professor Afət Abbasova qeyd edib ki, Bəxtiyar Vahabzadə haqqa, ədalətə və azadlığa çağıran bir şair olub. Onun qəlbi daim vətən sevgisi ilə döyünüb. “Sovet ideologiyasının hökm sürdüyü dövrdə belə, vətənin bölünməsinə biganə qalmayıb, “Gülüstan” poemasını yazaraq dərdini sözə çevirib. Vətən sevgisi onun bütün yaradıcılığının əsas xəttini təşkil edib. “Gülüstan” poemasından sonra ciddi təzyiqlərə məruz qalsa da, Ulu Öndər Heydər Əliyev gənc Bəxtiyarı bu təzyiqlərdən xilas edib. Bəxtiyar Vahabzadənin poeziyası çox zəngindir və onun 70-dən çox kitabı çap olunub”,- deyə A.Abbasova əlavə edib.

Prezident Kitabxanası direktorunun müşaviri Nazim Mustafa kitabda Bəxtiyar Vahabzadənin seçilmiş fikirləri, aforizmləri və müdrik kəlamlarının toplandığını vurğulayıb. Onun sözlərinə görə, 600 səhifədən artıq olan bu nəşrdə onun bütün irsi beş fəsildə sistemli şəkildə təqdim olunub.

Kitabın “Ön söz” müəllifi İslam Sadıq bildirib ki, Bəxtiyar Vahabzadə Azərbaycan ədəbiyyatının ən qüdrətli nümayəndələrindən biridir. Onun fikrincə, bu kitabın ərsəyə gəlməsi təsadüfi deyil. “Müəllif Fikrət Əsgərov Bəxtiyar Vahabzadəyə böyük sevgi ilə yanaşaraq onun aforizmlərini mövzulardan asılı olaraq qruplaşdırıb. Bu isə olduqca çətin və məsuliyyətli bir işdir. Bəxtiyar Vahabzadənin yaradıcılığını dərinliklə anlamaq üçün onu dəfələrlə oxumaq və əzbərləmək belə kifayət etmir. “Gülüstan” poemasını yalnız Bəxtiyar Vahabzadə kimi filosof-şair yaza bilərdi”,- deyə İ.Sadıq əlavə edib.

Milli Məclisin deputatı Cavanşir Feyziyev Xalq şairi haqqında danışarkən söyləyib: “Şəxsi tanışlığıma əsaslanaraq deyə bilərəm ki, Bəxtiyar Vahabzadə şəxsiyyət olaraq da çox zəngin bir dünyaya malik idi. Onu tanıdıqca daha dərin mənəvi keyfiyyətlərə məxsus insan olduğunu anlayırsan. Hələ tələbəlik illərindən vətənpərvərliyi ilə seçilən Bəxtiyar Vahabzadə yaradıcılığı və şəxsiyyəti ilə Azərbaycan ədəbiyyatında silinməz iz qoyub. Onun timsalında biz Nizami və Füzuli kimi böyük söz ustadlarının eşqini görürük. Özümü xoşbəxt hesab edirəm ki, onunla eyni dövrdə yaşamışam”.

Kitabın tərtibatçısı Fikrət Əsgərov söyləyib ki, bu nəşr şairin mənəvi irsinin ən incə məqamlarını əhatə edir: “Kitabda müdriklik mənbəyi sayılacaq, nəsihət xarakteri daşıyan şeirlərindən seçmələr yer alıb. Məqsədim Bəxtiyar Vahabzadənin irsini gələcək nəsillərə çatdırmaqdır”.

AMEA-nın Ədəbiyyat İnstitutunun direktorunun müavini, filologiya elmləri doktoru Əlizadə Əsgərli, Azərbaycan Yazıçılar İttifaqının Şəki bölməsinin sədri Vaqif Aslan, filologiya elmləri doktorları Bahar Cəfərova, Məsməxanım Qazıyeva, Sevinc Əliyeva, Bəxtiyar Vahabzadə haqqında kitabların müəllifi Aida Mirzəyeva və Azərbaycan Texniki Universitetinin dosenti Təbriz Şəmiyev çıxış edərək Bəxtiyar Vahabzadənin yaradıcılığı, elmi araşdırmaları və ictimai-siyasi xadim kimi çoxşaxəli fəaliyyəti haqqında fikirlərini bölüşüblər.

Qeyd edək ki, yubilyarın müxtəlif dillərdə çap edilən kitablarının virtual sərgisi kitabxananın saytında yerləşdirilib.