Bakı Şəhər Mədəniyyət Baş İdarəsinin tabeliyində olan Zirə qəsəbə Mədəniyyət Mərkəzində Xalq şairi Bəxtiyar Vahabzadənin 100 illik yubileyinə həsr olunmuş “Ana dili” qiraət müsabiqəsi keçirilib.

Müsabiqənin keçirilməsində əsas məqsəd uşaqları Bəxtiyar Vahabzadə yaradıcılığı ilə daha yaxından tanış etmək və ana dilimizin zənginliyini gənc nəslə sevdirməkdir.

Müsabiqədə Zirə qəsəbə Mədəniyyət Mərkəzi, Vaqif Mustafazadə adına və Binə qəsəbə Mədəniyyət Mərkəzlərinin fəal üzvləri iştirak edərək, şairin seçilmiş şeirlərini məharətlə səsləndiriblər.

Yarışda 7–14 yaş arası uşaqlar səslənmə səlisliyi, tonlama və şeir təqdimatı üzrə qiymətləndirilib.

Münsiflər heyətinin qərarına əsasən I yer – Turan Məmmədov (Zirə qəsəbə Mədəniyyət Mərkəzi), II yer – Zəhra Kazımzadə (Binə qəsəbə Mədəniyyət Mərkəzi), III yer – Mehri Əmirova (Zirə qəsəbə Mədəniyyət Mərkəzi) layiq görülüblər.

Qaliblər medallarla təltif edilib, digər iştirakçılara isə sertifikatlar təqdim olunub.