Vasif Hacıağa oğlu Babayev 1940-cı il sentyabr ayının 16-da Bakı şəhərində anadan olub. 1965- ci ildə Azərbaycan Dövlət İncəsənət İnstitutunu bitirib. 1964-cü ildən Azərbaycan Dövlət Televiziya və Radio Verilişləri Komitəsində əvvəlcə rejissor köməkçisi, assistent, rejissor olub, 1966-cı ildə Leninqrad Televiziyası nəzdində Ali Televiziya rejissoru kurslarını bitirib. 1969-cu ildən televiziyanın baş rejissoru, 1969-1987- ci illərdə onlarla genişformatlı “Yeni il mavi işıq” televiziya proqramları və bayram verilişlərinin quruluşçu rejissoru olub. 1967-1986-cı illərdə Bolqarıstan, Yuqoslaviya, Avstriya, Macarıstan, Yunanıstan, İran, Türkiyə, Malta, İspaniya Fransa, İtaliya kimi xarici ölkələrdə çəkilişlər apararaq verilişlər və kinofilmlər yaradıb. O, jurnalist Nadejda İsmayılova ilə birlikdə 1988-ci ilin əvvəllərində kinoteleviziya tarixində ilk dəfə olaraq araşdırmalar apararaq “Mikayıl Müşfiq”, “Abbas Mirzə Şərifzadə”, “Ülvi Rəcəb”, “Ruhulla Axundov”, “Hüseyn Rəhmanov”, “Salman Mümtaz” kimi “siyasi məhbuslar”ın şəxsi işləri əsasında bir sıra silsilə verilişlər hazırlayıb. 1991-ci ildə Azərbaycan Dövlət Tele-radio Verilişləri Komitəsinin bədii rəhbəri vəzifəsinə təyin edilib.

1994-1996-cı illərdə “MİR” dövlətlərarası Teleradio şirkətinin direktoru, 1996-1999-cu illərdə “Sara” müstəqil Teleradio şirkətinin icraçı direktoru, 2001-2006-cı illərdə Moskvada Rusiyanın “İnter-Az” müstəqil Teleradio şirkətinin vitse-prezidenti olub. 40-a yaxın sənədli filmin müəllifi və rejissorudur. Bu filmlərin bəziləri müxtəlif kinoforumlarda mükafatlara layiq görülüb. 1970-1982-ci illərdə Ulu Öndər Heydər Əliyevin iştirakı ilə keçirilən dövlət və hökumət tədbirlərinin, televiziya verilişlərinin və canlı yayımlanan proqramların aparıcı rejissoru olub. 1973-cü ildən Kinematoqrafçılar İttifaqları Konfederasiyasının üzvüdür. O, 1972-1987- ci illərdə R.Həsənoğlu ilə birlikdə iki ildən bir SSRİ Mərkəzi televiziyasından İntervideniye sistemi ilə Avropaya yayımlanan iki saatlıq Azərbaycan haqqında proqramların müəllifi və rejissoru olub. V. Babayev ümummilli lider Heydər Əliyevin televiziya və kino salnaməsinin yaradıcılarından biridir. 2000-ci ildən Peşəkar Azərbaycan kinorejissorları gildiyasının üzvüdür.

Görkəmli televiziya və kino rejissoru Vasif Babayev 1967-ci ildə Azərbaycan SSR Ali Sovetinin Fəxri fərmanı ilə təltif edilib, 1977-ci ildə Azərbaycanın “Əməkdar artist”, 1989- cu ildə “Xalq artisti” fəxri adlarına, 1981-ci ildə “SSRİ Televiziya və radio əlaçısı” adına layiq görülüb. 1995-ci ildə “MİR” Dövlətlərarası teleradio şirkətinin Azərbaycan nümayəndəliyinin direktoru işləyərkən beynəlxalq “Humay” mükafatı alıb, 1999-cu ildə “Akademik Yusif Məmmədəliyev” medalı ilə təltif edilib. 2004-cü ildə Beynəlxalq Televiziya və Radio Akademiyasının akademiki olub, 2005-ci ildən Azərbaycan Respublikası Prezidentinin fərdi təqaüdçüsüdür.

Tanınmış kinorejissor Arif Babayevin kiçik qardaşlarından biridir.

Xalq artisti Vasif Babayev Azərbaycanda televiziya rejissorluğu məktəbinin qurucularından biri, mübariz, təvazökar və təəssübkeş insandır. O, öz işinin fədaisidir və neçə-neçə nəsil televiziya işçilərinin yetişməsində bilavasitə əməyi olub. Vasif müəllim tək rejissor deyil, həm də reportyor kimi hər zaman irəlidə olub. Onun 20 Yanvar hadisələri zamanı Dövlət Televiziyasında göstərdiyi fədakarlıqlar, hadisələrin qaynar nöqtələrindən apardıqları çəkilişlər, çıxışları, ümumiyyətlə yaratdığı ekran və efir əsərlərinin ana xəttini də məhz Vasif Babayev səmimiyyəti ilə yoğrulmuş və tamaşaçının qəlbinə sirayət edən vətənpərvərlik ruhu təşkil edir. Azərbaycan, ziyalılarımız, istedadlarımız, sənətkarlarımız, qəhrəmanlarımız, onların nəsillərə yadigar olan irsinin, rəşadətinin təbliği və milli keyfiyyətlərimizin ən gözəl rakurslardan təqdimatı Vasif Babayev yaradıcılığının vizit kartıdır.