XƏBƏRLƏR
MƏLUMAT
Xalq artisti Əbdül Mahmudovun 80 illik yubileyi ilə bağlı tədbir təşkil olunub
ÜMÜMİ XƏBƏRLƏR
10/06/2024 12:34

Nizami Kino Mərkəzində kinorejissor, ssenarist və aktyor, Xalq artisti Əbdül Mahmudovun 80 illik yubileyi ilə bağlı tədbir təşkil olunub.

AZƏRTAC xəbər verir ki, əvvəlcə aktyorun rol aldığı “Yeddi oğul istərəm” filmindən kadrlar nümayiş olunub.

Tədbirin təşkilatçısı, “Dünya Azərbaycanlıların Həmrəyliyinə Dəstək” İctimai Birliyinin prezidenti Tofiq Əlizadə Əbdül Mahmudovu 80 illik yubileyi münasibətilə təbrik edərək ona ən xoş arzuların çatdırıb.

Azərbaycan kinorejissorları arasında özünəməxsus yeri olan Ə.Mahmudovun yaradıcılığından danışan Tofiq Əlizadə diqqətə çatdırıb ki, Xalq artistinin kinoya gəlişi uşaqlıq illərində çəkildiyi “Bir məhəllədən iki nəfər” və “Leyli və Məcnun” filmləri ilə başlayıb: “Ömrünün 67 ilini Azərbaycan kinosunun inkişafına həsr etmiş Əbdül Mahmudov 1966-cı ildən "Azərbaycanfilm" kinostudiyasında aktyor kimi çalışıb. Sonra bir müddət kinostudiyanın nəzdindəki kinoaktyor teatrının bədii rəhbəri olub. O, 25 filmə çəkilib, rejissor olaraq 12 bədii film çəkib, 4 kinofilmdə isə rejissor assistenti olub”.

Tədbirdə Xalq artistləri Rafiq Əzimov, Xalidə Quliyeva, Əməkdar artist Suqra Bağırzadə Əbdül Mahmudovla birgə çəkildikləri filmlərdən və çəkiliş meydançalarında olan maraqlı, xoş hadisələrdən danışıblar.

Mərasimdə çıxış edən digər natiqlər də Xalq artisti Əbdül Mahmudovun uzun illər Azərbaycanın kino sahəsinin inkişafına verdiyi töhfələri yüksək qiymətləndirərək görkəmli sənətkara ən xoş arzularını çatdırıblar.

 

Baxış sayı: 88