Bakı Şəhər Mədəniyyət Baş İdarəsinin tabeliyində olan  Yasamal rayon Heydər Əliyev Mərkəzində 44 günlük Vətən müharibəsi şəhidi, Xüsusi Təyinatlı Qüvvələrin kapitanı Nurlan Mustafayevin xatirəsinə həsr olunmuş "Vətənə bağlı ömür" adlı sənədli-bədii filmi nümayiş olunub.

Tədbirdə rəsmilər, şəhidin ailə üzvləri, mədəniyyət işçiləri, media nümayəndələri və digər qonaqlar iştirak ediblər.

Tədbir iştirakçıları öncə Mərkəzin eksopozisiya zalında Ulu Öndərin büstünü ziyarət ediblər , Ümummilli Lider Heydər Əliyevin siyasi fəaliyyətini əks etdirən eksponatlarla tanış olublar.

Tədbir Azərbaycan Respublikasının Dövlət Himninin səsləndirilməsi ilə başlanıb və şəhidlərimizin xatirəsi bir dəqiqəlik sükutla yad edilib.

Ardınca "Azərbaycan bayrağı" ordenli kapitan Nurlan Mustafayevin anadan olmasının 35 illiyinə həsr edilmiş “Vətənə bağlı ömür” filmi nümayiş olunub.

Şəhidin anası Rahilə xanım çıxışında həyatını oğlunun adının yaşamasına, xatirəsinin əbədiləşdirilməsinə həsr etdiyini vurğulayıb.  O, Şəhid Nurlan Mustafayevin həyatı və döyüş yolundan bəhs edən filmin çəkilməsində göstərilən dəstəyə görə hər kəsə öz təşəkkürünü bildirib.

Digər çıxışçılar filmdə şəhidin həyatı və döyüş yolu, Vətən müharibəsindən əks olunan kadrları izlədikdən sonra çox təsirləndiklərini bildirərək, Nurlan Mustafayev kimi oğulların hesabına müharibədə zəfər qazanıldığını vurğulayıblar. Qeyd ediblər ki, Nurlan Mustafayev 30 illik ömründə 100 ilin hekayəsini, qəhrəmanlığını özündə yaşadıb.

Qeyd edək ki, Nurlan Mustafayev 2020-ci il Vətən müharibəsi zamanı döyüşlərdə iştirak edib və 2020-ci ilin oktyabr ayının 11-də şəhidlik zirvəsinə ucalıb. Nurlan Hamlet oğlu Mustafayev Azərbaycan Respublikası Prezidentinin Sərəncamları ilə ölümündən sonra "Azərbaycan Bayrağı" ordeni, "Vətən uğrunda" , "Füzulinin azad olunması uğrunda", "Cəbrayılın azad olunması uğrunda" və "Kəlbəcərin azad olunması uğrunda" medalları ilə təltif edilib.