XƏBƏRLƏR
MƏLUMAT
Vaqif Mustafazadə adına Mədəniyyət Mərkəzində tədbir keçirilib
ÜMÜMİ XƏBƏRLƏR
07/05/2024 17:29

Mayın 6-da Bakı Şəhər Mədəniyyət Baş İdarəsinin tabeliyində olan Vaqif Mustafazadə adına Mədəniyyət Mərkəzində 9 May -Faşizm üzərində Qələbə Gününə və Ümummilli lider Heydər Əliyevin anadan olmasının 101-ci ildönümünə həsr olunmuş “Müasir Azərbaycan tarixinin Heydər Əliyev zirvəsi” adlı tədbir keçirilib.

Əvvəlcə Azərbaycan Respublikasının Dövlət Himni səsləndirilib, şəhidlərimizin əziz xatirəsi  bir dəqiqəlik sükutla yad edilib və Ulu Öndər Heydər Əliyev ehtiramla anılıb.

Daha sonra Ulu Öndərə həsr olunmuş videoçarx nümayiş olunub.

Çıxışlarda qeyd olunub ki, Ümummilli lider Heydər Əliyev bütün həyatını xalqının xoşbəxt gələcəyinə, qüdrətli Azərbaycan dövlətinin yaradılmasına və inkişafına həsr edib, bu dahi şəxsiyyətin Vətən və xalq qarşısındakı xidmətləri misilsizdir.

Həmçinin Azərbaycan xalqının İkinci Dünya müharibəsində göstərdiyi qəhrəmanlıq nümunələri haqqında danışılıb. Vurğulanıb ki, Azərbaycan xalqı İkinci Dünya müharibəsində həm döyüş meydanlarında, həm də arxa cəbhədə əsl şücaət və əzmkarlıq nümunələri göstərib.

Tədbirin bədii hissəsində 14 nömrəli Uşaq Musiqi Məktəbinin xor kollektivi və xalq çalğı alətləri ansamblı, 168, 186, 235, 243 nömrəli tam orta məktəblərin şagirdləri vətənpərvər mahnılar ifa ediblər.

Sonda Mədəniyyət Mərkəzinin dram dərnəyinin şagirdlərinin iştirakı ilə Pərviz Seyidlinin “O qayıdacaq” pyesindən kiçik səhnəcik nümayiş olunub. 

Sonda Ümummilli lider Heydər Əliyevə və 9 May-Faşizm üzərində Qələbə Gününə həsr olunmuş rəsm sərgisinə baxış keçirilib.

Baxış sayı: 125