Beynəlxalq Muğam Mərkəzinin (BMM) “Ustad dərsi” layihəsi çərçivəsində “Nəva” və “Şur” dəsgahları həm instrumental, həm də xanəndələrin ifasında tamaşaçılara təqdim olunub.

Mərkəzdən AZƏRTAC-a bildirilib ki, konsert-mühazirə tarzən, pedaqoq Elxan Müzəffərovun iştirakı ilə reallaşıb.

Beynəlxalq Muğam Mərkəzinin direktoru, Əməkdar artist Sahib Paşazadə qocaman tarzən Elxan Müzəffərovun ifasında təqdim olunacaq muğamların öz dolğunluğu ilə bir daha diqqət çəkəcəyini söyləyib.

“Nadir muğam bilicilərimizdən az səslənən muğam dəsgahlarını öyrənib gələcək nəsillərə təbliğ etmək BMM-nin əsas məqsədləri sırasındadır. Az səslənən muğamlarımızı yaşatmalı və təbliğ etməliyik. BMM mütəmadi olaraq unudulan muğamlara müraciət edərək silsilə şəkildə onları ictimaiyyətə təqdim edəcək. Elxan Müzəffərovun ifasında muğamların təfsiri və izahını dinləmək muğamsevərlər üçün maraqlı olacaq”, - deyə Sahib Paşazadə qeyd edib.

Konsertin ikinci hissəsində xanəndələr Xətai Hacıyev, Malik Həsənov və Fuad Əzizzadə “Şur” dəsgahını təqdim ediblər. Xanəndələri Kamal Nuriyev (tar), Əməkdar artist Toğrul Əsədullayev (kamança), Rafael Əsgərov (balaban), Əməkdar artist Çinarə Heydərova (qanun) və Amil Mustafayev (nağara) müşayiət ediblər.

Qeyd edək ki, layihənin məqsədi klassik ifaçılıq məktəbimizin yaşadılmasına və gələcək nəsillərə ötürülməsinə, ustad-şagird ənənələrinin qorunmasına dəstək olmaqdır. İl ərzində mütəmadi olaraq təşkil ediləcək ustad dərslərində muğam ifaçılığı sənətinin görkəmli nümayəndələrinin iştirakı nəzərdə tutulub.