XƏBƏRLƏR
MƏLUMAT
Unudulmaz sənətkar - Mais Salmanov
ÜMÜMİ XƏBƏRLƏR
12/02/2024 09:06

Azərbaycanın tanınmış xanəndəsi, Opera və Balet Teatrının solisti Əməkdar artist, Prezident təqaüdçüsü adına layiq görülmüş Mais Qurbanoğlu Salmanov 12 fevral 1933-cü ildə Şəmkir rayonunun Morul kəndində anadan olub. Azərbaycan Dövlət Universitetini və Azərbaycan Dövlət Mədəniyyət və İncəsənət Universitetini bitirib. Azərbaycan opera sənətinin və musiqisinin inkişafına töhfələr verib, uzun müddət Üzeyir Hacıbəylinin "Leyli və Məcnun" operasında Məcnun rolunun ifaçısı olub.

Mais Salmanov 1982-ci ildə Ağdam Musiqi Texnikumuna direktor təyin edilib. Texnikumun inkişafında onun xüsusi xidmətləri olub. Musiqi ocağına əlavə korpus məhz onun rəhbərliyi dövründə inşa edilib.

Tanınmış xanəndənin rəhbərliyi dövründə atılan addımlardan biri də texnikumda "Opera studiyası"nın yaradılması olub.

"Opera studiyası"nda "Leyli və Məcnun", "Şah İsmayıl" əsərlərindən pərdələr hazırlanıb və o dövrdə Akademik Milli Dram Teatrı ilə sıx əməkdaşlıq əlaqələri qurulub. Hətta məşqlər korifey sənətkar Arif Babayevin və Xalq artisti Qəndab Quliyevanın iştirakıyla aparılıb.

Sənətkar 1978-ci ildə “Azərbaycanın Əməkdar artisti” fəxri adına layiq görülüb, 2000-ci ildən Prezident təqaüdçüsü olub.

Mais Salmanov 25 iyul 2008-ci ildə Bakıda vəfat edib.

Baxış sayı: 61