Aprelin 15-də Bakı Şəhər Mədəniyyət Baş İdarəsinin tabeliyində olan Yasamal rayon Heydər Əliyev Mərkəzində “Konstitusiya və Suverenlik İli” çərçivəsində “Ulu öndərin xarici siyasət kursu: Sülh, Təhlükəsizlik, İnkişaf” mövzusunda açıq dərs keçirilib.

Açıq dərsdə Fizika-riyaziyyat və informatika təmayüllü liseyin müəllim və şagird kollektivi  iştirak ediblər.

Məktəblilər öncə Mərkəzin ekspozisiya zalında Ulu öndər Heydər Əliyevin büstünü ziyarət ediblər.

Açıq dərs Azərbaycan Respublikasının Dövlət Himninin səsləndirilməsi ilə başlanıb. Daha sonra Ulu öndər Heydər Əliyevin əziz xatirəsi bir dəqiqəlik sükutla anılıb.

Mərkəzin əməkdaşı çıxış edərək Heydər Əliyevin xarici siyasətində Azərbaycanın elmini, mədəniyyətini, tarixini dünya dövlətlərinə tanıtmaq, xarici dövlətlərlə bərabərhüquqlu, Azərbaycanın mənafeyinə xidmət edən əlaqələr yaratmaq və Qarabağ probleminin həllinin ən mühüm yer tutduğunu qeyd edib.

Sonra liseyin tarix müəllimi mövzu ilə bağlı slaydlardan ibarət təqdimat vasitəsilə çıxış edərək şagirdlərə geniş məlumat verib və açıq dərs diskussiya şəklində davam edib.

Sonda Ümummilli lider Heydər Əliyevin xarici səfərlərini əks etdirən “Bir səfərin izi ilə - Türk dünyası” sənədli filmi nümayiş olunub.