Türkiyənin Pamukkale Universiteti Çağdaş türk ləhcələri və ədəbiyyatı bölümünün müəllimi, uşaq ədəbiyyatı araşdırmaçısı Yaşar Sözen F.Köçərli adına Respublika Uşaq Kitabxanasının qonağı olub. Tədqiqatçı ilə görüşdə Azərbaycan uşaq yazarlarından Rafiq Yusifoğlu, Sevinc Nuruqızı, Reyhan Yusifqızı, Solmaz Amanova və digərləri iştirak ediblər.

Görüş zamanı Yaşar Sözenin “Müstəqillik dövründə (1991-2024)  Azərbaycan uşaq ədəbiyyatında hekayə” adlı araşdırmasının müzakirəsi də aparılıb. Gənc alim bu tədqiqatı haqqında geniş danışıb, vurğulayıb ki, məqsədi müstəqillik dövründə Azərbaycan uşaq ədəbiyyatının inkişaf tarixini öyrənmək və onu Türkiyədə tanıtmaqdır. Mövzu üç dönəm üzrə - maarifçilik, sovet və müstəqillik dövrlərini əhatə edib. Araşdırma zamanı 18 Azərbaycan uşaq yazarının 552 hekayəsinin xəritə-sxemi (təsviri) hazırlanıb, 10 yazarın isə hekayələri məzmununa görə təhlil edilib. Eyvaz Zeynalov, Rafiq Yusifoğlu və Sevinc Nuruqızının hekayələri geniş təhlil olunub. Qeyd edilib ki, uşaqlar üçün yazılan hekayələrdə təsvir olunan hadisələr mürəkkəb olmamalıdır. Əsasən məntiqi nəticələrlə bitən hərəkətli hadisələr daxil edilməlidir. Komediya səhnələri maarifləndirici və əyləncəli elementlərdən asılı olaraq hekayə mətnlərinə daxil edilə bilər.

Sonda araşdırmaçı Yaşar Sözen uşaq yazarlarının suallarını cavablandırıb.