Türkiyənin Diyanət İşlər Baş İdarəsi tərəfindən Ankarada keçirilən Beynəlxalq İslam Sənətləri sərgisində Azərbaycan geniş təmsil olunub.

AZƏRTAC xəbər verir ki, sərginin açılış mərasimi mayın 7-də Türkiyə paytaxtındakı ATO Konqresium mərkəzində keçirilib.

Bir çox ölkələrin tanınmış mədəniyyət xadimlərinin iştirak etdiyi tədbirdə, islamı dəyərləri əks etdirən müxtəlif sənət nümunələri nümayiş olunub.

Mədəniyyət Nazirliyinin dəstəyi ilə Türkiyədəki Azərbaycan Mədəniyyət Mərkəzi tərəfindən təşkil olunan Azərbaycan stendi də böyük maraqla qarşılanıb.

Açılış çərçivəsində Türkiyənin birinci xanımı Əminə Ərdoğan Azərbaycan milli stendini ziyarət edib.

Sərgidə Azərbaycan Xalça Muzeyinin mütəxəssisi Elnarə Rəsulova, rəssam-dizayner Pərvanə Məmmədova, xalçaçı Ruhiyyə Süleymanova və ağacoyma sahəsi üzrə mütəxəssis Şahin Rəsulovun əl işləri, xalçalar, milli geyimli kuklaları, suvenirləri və ağacoyma üsulu ilə milli mədəniyyətimizə dair hazırlanmış işləri nümayiş etdirilib.

Qeyd edək ki, tədbir çərçivəsində dekorativ tətbiqi və təsviri sənət nümunələrinin nümayişi, konfranslar, panel müzakirələri, master-klas, konsert proqramları da planlaşdırılır.

Ramin Abdullayev

AZƏRTAC-ın xüsusi müxbiri

Ankara