Avqustun 18-i Əməkdar jurnalist, Azərbaycan kinosunun inkişafına töhfələr vermiş yazıçı, publisist və ssenarist Asim Cəlilovun 85 yaşı tamam olur.

Asim Qulu oğlu Cəlilov Bakıda anadan olub. Azərbaycan Dövlət Universitetində (1961), Moskva İctimai Elmlər Akademiyasında təhsil alıb. “Molodyoj Azerbaydjana” qəzetində (1967-1972), “Azərbaycanfilm” kinostudiyasında (1979-1983), “Bakinski Raboçiy” qəzetində (1991-1995) baş redaktor vəzifəsində işləyib.

Onun yaradıcılığında müxtəlif mövzuları işıqlandıran publisistik yazılarla yanaşı, onlarla qəhrəmana əbədi həyat verən ekran əsərləri də var. Dərin məzmun, incə yumor, həssas yanaşma və psixoloji təsvir Asim Cəlilovun kino yaradıcılığını xarakterizə edən əsas mövzulardır.  

O, “Diplom işi” (1979) qısametrajlı bədii filminin, “Yol əhvalatı” (1980), “Avqust gələndə” (1984), “Şeytan göz qabağında” (1987), “Yay gününün xəzan yarpaqları” (1987) tammetrajlı bədii filmlərinin, “Koqalımdan xəbərlər” (1987), “Yubiley (II)” (1990)  qısametrajlı sənədli filmlərinin ssenari müəllifi, “Anın quruluşu” (1980), “Gözlə məni” (1980), “Ailə” (1998) tammetrajlı bədii filmlərinin və “9 dəqiqə” (1999) qısametrajlı sənədli filminin redaktorudur.

Tanınmış jurnalist və ssenarist Asim Cəlilovu yubileyi münasibətilə təbrik edir, ona möhkəm cansağlığı və yeni-yeni yaradıcılıq uğurları arzulayırıq!