Bakı Şəhər Mədəniyyət Baş İdarəsi Xəzər rayon Mərkəzləşdirilimiş Kitabxana Sisteminin 7 nömrəli filialı tanınmış teatr və kino aktyoru Süleyman Ələsgərov yaradıcılığına müraciət edib.

Materialda aktyor haqqında ətraflı məlumat verilib. Bildirilib ki, Süleyman Ələsgərov 1915-ci ildə Bakı şəhərində dünyaya göz açıb.  Səhnəyə 1933-cü ildə Dənizçilər mədəniyyət evinin dram dərnəyində çıxıb. 1936-cı ilin sentyabrında Süleyman Ələsgərov Gənc Tamaşaçılar Teatrında müsabiqə yolu ilə aktyor kimi işə götürülüb.

Süleyman Ələsgərov bu teatrda fasiləsiz olaraq altmış üç il səhnəyə çıxıb. Dramlarda, komediyalarda, faciələrdə, nağıllarda, nağıl-dastan süjetli pyeslərdə bir-birindən əlvan rollar yaradıb. Səhnə məntiqini həmişə həssaslıqla gözləyib.

Aktyor "Azərbaycanfilm" kinostudiyasında istehsal olunan bir çox filmlərdə müxtəlif rollarda çəkilib. "Yenilməz batalyon", "Babamızın babasının babası" "Bakıda küləklər əsir", "Bəxtiyar", "Bir ailəlik bağ evi", "Bir cənub şəhərində", "Xatirələr sahili" "İnsan məskən salır" "İstintaq davam edir", "Torpaq. Dəniz. Od. Səma" və digər filmlərdə epizodik rollar yaratsa da, onları sevdirə bilib.

1969-cu ildə "Bizim Cəbiş müəllim" filmi ekranlara çıxanda onun arıq, bir qədər xəstəhal, yaşlı qəhrəmanını yaradan aktyorun oyun tərzi hamını heyran edib. Filmdə hadisələr II Dünya müharibəsi illərində Bakıda cərəyan edir. Burada müharibə illərində qələbə naminə hər cür maddi çətinliklərə dözüb, ailəsini halal zəhmətlə dolandırmağa çalışan, Vətənin azadlığını hər şeydən yüksək tutan sadə adamların mənəvi ucalığından söhbət açılır. Film Maqsud İbrahimbəyovun "Müharibənin 1001-ci gecəsi" ssenarisi əsasında çəkilib. Onun əsas qəhrəmanı Cəbiş müəllim çətin, məsuliyyət tələb edən bir obrazdır. Müharibənin bütün ağrılarını qəlbən yaşayan bu sadə müəllim ətrafındakı insanların laqeydliyi ilə heç cür barışa bilmir. Cəbiş müəllim prinsipial insandır. O, sona kimi "Mən sabun bişirməyəcəyəm", – deyir. Vətənpərvər insandır. Yaşının çox olmasına baxmayaraq cəbhəyə, döyüşə getməyə can atır. O, öz ailəsindən çox ətrafdakıların taleyini düşünür. Xalq artisti öz aktyor məharəti ilə bu rolu tamaşaçılara sevdirə bilib. Aktyor, kinorejissor Həsən Seyidbəyli çox uğurlu aktyor seçimi edərək onu bu rola dəvət edib. 

Süleyman Ələsgərov rejissorun bütün ümidlərini doğruldub. Maraqlıdır ki, filmin sonuna kimi tamaşaçı onun hərəkətlərini diqqətlə izləyir və aktyorun ifa tərzi obrazı tamaşaçıya daha da yaxınlaşdırır. Bir sözlə, Cəbiş müəllim aktyorun seçilən, hörmət və məhəbbətlə yad edilən ekran qəhrəmanıdır. Onun maraqla baxılan rolları sırasında Eldostu ("Çiçəkii dağ", Məmmədhüseyn Təhmasib), Hacı Nuru və Molla Salman ("Molla İbrahimxəlil kimyagər", Mirzə Fətəli Axundzadə), Valentin və Pontolone ("İki ağanın bir nökəri", Karlo Haldoni), Molla Səfi və Hacı Qəmbər ("Hacı Qəmbər", Nəcəf bəy Vəzirov), Lorenso ("Romeo və Cülyetta", Vilyam Şekspir), Yaşar ("Yaşar", Cəfər Cabbarlı) və s. qəhrəmanları da var idi. Süleyman Ələsgəov bir neçə televiziya tamaşasında, televiziyanın müxtəlif əyləncə proqramlarında özünəməxsus obrazlar yaradıb.

Sevilən aktyor 27 fevral 1954-cü ildə Azərbaycan Respublikasının "Əməkdar artisti", 1 dekabr 1982-ci ildə isə "Xalq artisti" fəxri adlarına layiq görülüb. 

Süleyman Ələsgərov 1998-ci il dekabrın 10-da Bakıda vəfat edib.