Bakı Şəhər Mədəniyyət Baş İdarəsinin Suraxanı rayon Heydər Əliyev Mərkəzi və Suraxanı Rayon İcra Hakimiyyəti birlikdə  elmi-praktik konfrans keçirib.

Konfrans iştirakçıları əvvəlcə Ulu Öndərin Suraxanı rayonu Heydər Əliyev parkında ucalan abidəsini ziyarət edib, önünə gül dəstələri düzüblər.

Tədbir Azərbaycan Respublikasının Dövlət Himninin səsləndirilməsi, ümummilli lider Heydər Əliyevin və şəhidlərimizin xatirəsinin bir dəqiqəlik sükutla yad edilməsi ilə başlanıb. 

Konfrans çərçivəsində mart ayı ərzində keçirilmiş məqalə-yazı müsabiqənin mərhələləri barədə məlumat verilib. Bildirilib ki, 36 məktəbin iştirakı ilə təşkil olunmuş məktəbdaxili müsabiqələrdə hər məktəbdən ən azı 5 nəfər olmaqla, ümumilikdə 100-ə yaxın şagird seçim mərhələsinə vəsiqə qazanıb. Münsiflər heyətinin qərarı ilə müsabiqənin yekun mərhələsində ümumilikdə 5 mövzu üzrə 10 nəfər şagird məqalə-yazılarını hazırladıqları slaydlarla təqdim ediblər.

Sonra çıxış edənlər qeyd ediblər ki, Azərbaycan tarixinin və Ulu Öndərin zəngin irsinin şagirdlər tərəfindən daha dərindən mənimsənilməsində bu müsabiqə xüsusi əhəmiyyət daşıyır. Şagirdlər verilən mövzular üzrə ən xırda incəliklərə, xüsusən də ümummilli lider Heydər Əliyevin son dərəcə zəngin olan həyat və fəaliyyətinin öyrənilməsinə böyük maraq və səy göstəriblər. 

Sonda fərqlənən şagirdlər Rayon İcra Hakimiyyəti başçısının Fəxri Fərmanı ilə təltif olunub və mükafatlandırılıblar.

Müsabiqənin keçirilməsinin əsas məqsədi şagirdlər arasında tarixə, mədəniyyətimizə, keçmişə və tarixi şəxsiyyətlərə, milli-mənəvi dəyərlərə diqqət və marağı artırmaq, onlarda elmi araşdırma və tədqiqat aparmaq, tarixi faktları analiz edib müəyyən nəticəyə gələ bilmək bacarığı aşılamaqdır.