Bakı Şəhər Mədəniyyət Baş İdarəsinin tabeliyində olan Nərimanov rayon Mərkəzləşdirilmiş Kitabxana Sisteminin Mərkəzi Kitabxanasında "Sözün Zəlimxan zirvəsi" adlı tədbir keçirilib.

Tədbirdə ziyalılar, mədəniyyət işçiləri, kitabxananın fəal oxucuları iştirak ediblər.

Tədbirin aparıcısı müasir Azərbaycan ədəbiyyatının görkəmli nümayəndəsi, Xalq şairi Zəlimxan Yaqubun həyatı və yaradıcılığı haqqında ətraflı məlumat verib.

Daha sonra çıxış edənlər vurğulayıblar ki, çağdaş Azərbaycan poeziyasında özünəməxsus yeri, poetik nəfəsi olan Zəlimxan Yaqubun əsərləri xalqımıza məxsus mütləq dəyərlərin, folklor yaradıcılığı qaynaqlarından süzülüb gələn ənənələrin diriliyi ilə səciyyələnir, ədəbiyyatımızda irsilik ideyasını tərənnüm edir.

Bədii hissədə H.Sarabski adına 7 nömrəli Uşaq Musiqi Məktəbinin saz kollektivi, 300 nömrəli tam orta məktəbin şagirdləri  çıxış ediblər.