Bakı Şəhər Mədəniyyət Baş İdarəsinin tabeliyində olan Mərdəkan Mədəniyyət Sarayının yaradıcı kolektivi Tələbə və gənclər cəmiyyəti ilə birlikdə “Əkinçi” qəzetinin yaradılmasının 150 illiyinə həsr olunmuş “Sözün gücü, qələmin qüdrəti” adlı tədbir keçirib.

Tədbir Azərbaycan Respublikasının Dövlət Himninin səsləndirilməsi və şəhidlərimizin əziz xatirəsinin bir dəqiqəlik sükutla yad edilməsi ilə başlanıb. 

Əvvəlcə milli mətbuatın yaradılması tarixi barədə məlumat verilib.

Tədbirdə çıxış edənlər bildiriblər ki, Azərbaycan milli mətbuatının 150 illik yubileyi xalqımızın mədəni və ictimai tarixində mühüm dönüş nöqtəsidir. 1875-ci ildə Həsən bəy Zərdabinin təsis etdiyi "Əkinçi" qəzeti ilə başlayan bu şərəfli yol, müxtəlif tarixi dövrlərdə inkişaf edərək bu gün müasir Azərbaycan mətbuatının əsasını təşkil edir.

Bədii hissədə şeirlər səsləndirilib,  “Lalələr” rəqs kollektivi rəqslər təqdim edib, Təhsil Tədris Mərkəzinin tələbələri, “Gənclərin Səsi” platformasının gənc aktyorları  səhnəciklər nümayiş etdiriblər.

Sonda Sarayda fəaliyyət göstərən rəsm kursunun və Tələbə və gənclər cəmiyyətinin fəal üzvlərinin “Əkinçi” qəzetinə həsr etdikləri sərgiyə baxış keçirilib.