Gənc və istedadlı yazar Təhminə Rafiq qızının “Sevgimin səsi” adlı şeirlər kitabı işıq üzü görüb.

AZƏRTAC xəbər verir ki, kitabda müəllifin mənəvi dünyasının çırpıntıları, həyat, dünya və sevgi haqqında qələmə aldığı poetik nümunələr toplanıb.

“Sevgimin səsi” kitabındakı şeirlər oxucunu keçmişin kövrək duyğuları ilə baş-başa qoyur, həm də onun əlindən tutub sevgi üfüqlərinə doğru aparır, gələcək barədə həzin xatirələrə dalır. Gənc müəllif yaşıdlarının məhəbbət dünyasından səmimi hisslərlə söhbət açır, onları saflığa və ülviliyə çağırır.

Poeziya həvəskarlarına ünvanlanan kitab mövzu dairəsinə görə daha çox gənclər arasında maraq doğuracaq.

Qeyd edək ki, Tahminə Rafiq qızı Verdiyeva 1990-cı ildə Laçın rayonunda anadan olub. Bakı Slavyan Universitetinin “Tərcümə” fakültəsində ali təhsilni başa vurduqdan sonra, həmin universitetdə “Jurnalistika” üzrə magistratura təhsili alıb. 2016-cı ildən Azərbaycan Dövlət İnformasiya Agentliyində (AZƏRTAC) çalışır. Publisistik və ədəbi müsabiqələrdə uğurlar qazanan müəllifin şeirləri müxtəlif beynəlxalq nəşrlərdə yayımlanıb, mükafatlara layiq görülüb.

Kitabın “Ön söz”ünün müəllifi şair-publisist, “Kredo” qəzetinin baş redaktoru Əli Rza Xələfli, redaktoru Süleyman Qaradağlıdır.