Bakı Şəhər Mədəniyyət Baş İdarəsinin tabeliyində olan Şüvəlan qəsəbə Mədəniyyət evinin “Səma” rəqs ansamblı Rəşid Behbudov adına Azərbaycan Dövlət Mahnı Teatrında “Türkün səsi” adlı konsert proqramı ilə çıxış edib.

Konsertdə Milli Məclisin deputatı, parlamentin Mədəniyyət komitəsi sədrinin müavini Günay Əfəndiyeva, deputatlar Tamam Cəfərova , Gülşən Paşayeva, Aydın Mirzəzadə , Şimali Kipr Türk Respublikasının Azərbaycan Respublikasındakı nümayəndəsi Ufuk Turqaner , Özbəkistan səfirliyinin müşaviri Axmed Mansur, Macarıstanın Azərbaycan Respublikasındakı Səfirliyinin birinci katibi Monika Felföldi , mədəniyyət işçiləri və digər qonaqlar  iştirak ediblər.

Konsertdə ilk olaraq Mədəniyyət evində fəaliyyət göstərən rəsm kursunun şagirdlərinin “Türkün səsi” adlı sərgisi nümayiş olunub.

Tədbir Azərbaycan Respublikasının Dövlət Himninin səsləndirilməsi ilə açıq elan edilib və şəhidlərimizin əziz  xatirəsi bir dəqiqəlik sükutla yad edilib.

Daha sonra aparıcı qonaqları salamlayaraq “Səma” rəqs ansamblının fəaliyyəti  haqqında məlumat verib. Bildirib ki, ansamblda 200-dən çox 4-18 yaş qrupunda oğlan və qız fəaliyyət göstərir.  Ansambl Azərbaycanda keçirilən dövlət tədbirlərində fəal iştirak edir və bir çox ölkələrdə çıxış edərək uğur qazanıb.

Konsert proqramında “Səma” rəqs qrupunun ifasında Azərbaycan və dünya xalqlarının rəqsləri nümayiş olunub.