Fevralın 5-də Bakı Şəhər Mədəniyyət Baş İdarəsinin tabeliyində olan A.Məlikov adına 11 nömrəli Onbirillik Musiqi Məktəbində görkəmli Azərbaycan bəstəkarı, pedaqoq, SSRİ Xalq artisti Qara  Qarayevin  anadan  olmasının 107 illiyinə həsr olunmuş ədəbi-bədii tədbir keçirilib.

Tədbirdə Q.Qarayevin həyat və yaradıcılığı haqqında məruzə dinlənilib. Bildirilib ki, Qara Qarayev milli və ümumbəşəri miqyasda tanınan yaradıcılığı ilə yeni yollar açan yenilikçi bəstəkar olub. Onun hər bir əsərinin premyerası musiqi həyatında xüsusi əlamətdar hadisəyə, bayrama, Azərbaycan mədəniyyətində dönüş nöqtəsinə çevrilib. Dünyaşöhrətli bəstəkarın əsərləri keçmiş SSRİ-nin əksər respublikalarında, ABŞ, Polşa, Misir, İspaniya, İtaliya, Fransa, Yaponiya, Almaniya və başqa ölkələrdə keçirilən möhtəşəm musiqi tədbirlərində uğurla ifa olunub.

Sonra məktəbin müxtəlif ixtisaslar üzrə təhsil alan şagirdləri bəstəkarın əsərlərindən ibarət konsert proqramı ilə çıxış ediblər.