XƏBƏRLƏR
MƏLUMAT
“Professor Qafar Cəbiyev – 70” silsiləsindən yubiley tədbirləri keçirilir
ÜMÜMİ XƏBƏRLƏR
15/08/2020 05:55

Azərbaycanda orta əsr tarixi arxeologiyası üzrə öz məktəbini yaratmış, tanınmış arxeoloq alim, tədqiqatçı və jurnalist Qafar Cəbiyevin bu il 70 yaşı tamam olur. Onlarla kitabın, yüzlərlə məqalənin, bir neçə monoqrafiyanın müəllifi olan Qafar müəllim bu gün də araşdırmalarını davam etdirir və Azərbaycan tarixinin, mədəniyyətinin dərin qatlarına işıq saçan əsərləri ilə elmin inkişafına öz töhfələrini verməkdədir.

Avqustun 14-də Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti, onun "Orta əsr Ağsu şəhəri" Dövlət Tarix-Mədəniyyət Qoruğu və "Miras" Mədəni İrsin Öyrənilməsinə Kömək İctimai Birliyi arxeoloq alim, professor Qafar Cəbiyevin anadan olmasının 70 illiyinə həsr olunmuş vebinarlara başlayıb.

İlk vebinar "Arxeoloji ekspedisiya: Şamaxı" mövzusuna həsr olunub. Vebinarın moderatoru "Orta əsr Ağsu şəhəri" Dövlət Tarix-Mədəniyyət Qoruğunun direktoru, tarix üzrə fəlsəfə doktoru Fariz Xəlilli, məruzəçiləri “Azərbərpa” Layihə-Tədqiqat İnstitutunun direktoru, memarlıq üzrə fəlsəfə doktoru Telman Kərimli, Qafar Cəbiyevin ekspedisiyalarının üzvləri tarix üzrə fəlsəfə doktoru Elmira Abbasova və Vüsal Həsənov olub. 

Vebinarda Şamaxının Dəmirçi kəndində yerləşən Gəgəli yaylağı nekropolu və "Ömər Sultan" ziyarətgahında aparılan arxeoloji tədqiqatlardan və onun nəticələrindən danışılıb.

Vebinarlar 15-16 avqust tarixlərində də davam edəcək. Həmin vebinarlarda Qəbələ-İsmayıllı və Ağsu-Kürdəmir abidələrindən, onlarda aparılan arxeoloji tədqiqatlardan bəhs ediləcək.

25-26 avqust tarixlərində isə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti, onun "Orta əsr Ağsu şəhəri" Dövlət Tarix-Mədəniyyət Qoruğu və "Miras" Mədəni İrsin Öyrənilməsinə Kömək İctimai Birliyi arxeoloq alim, professor Qafar Cəbiyevin anadan olmasının 70 illiyinə həsr olunmuş beynəlxalq vebinar-konfrans keçirəcək.

Konfransın mövzuları Qafar Cəbiyev və Azərbaycan arxeologiyası, orta əsr arxeologiyası, şəhər mədəniyyəti, Qafqaz Albaniyası arxeologiyası, Girdiman vilayəti abidələri, Azərbaycanın qala istehkamları, orta əsr sənətkarlığı, dini xatirə kompleksləri və s.-dir. Tezislər 20 avqusta qədər toplanılır. 

Baxış sayı: 324