Tanınmış alim, görkəmli dilçi və istedadlı türkoloq, filologiya elmləri doktoru, professor Mədəd Çobanovun xatirəsinə həsr edilmiş növbəti kitab işıq üzü görüb.

Bu barədə AZƏRTAC-a məlumat verən Əməkdar mədəniyyət işçisi Musa Nəbioğlu bildirib ki, Fərman Borçalının ərsəyə gətirdiyi “Dostluq məşəliydi Mədəd müəllim” adlı kitab Azərbaycanda Atatürk Mərkəzinin rəhbəri, akademik Nizami Cəfərovun dərin məzmunlu “Ön söz”ü ilə oxuculara təqdim olunur.

Kitabda Azərbaycan və Gürcüstanın görkəmli elm və sənət adamlarının, ictimai-siyasi xadimlərin, Mədəd müəllimin dostlarının, tələbələrinin və yaxınlarının xatirələri, eləcə də ona ithaf olunmuş şeirlər yer alıb.

Xatırladaq ki, Mədəd Namaz oğlu Çobanov 1937-ci il aprelin 11-də Gürcüstanın o zamankı Lüksemburq (indiki Bolnisi) rayonunun Darvaz kəndində anadan olub. Orta təhsilini doğma kəndində bitirdikdən sonra Tbilisi şəhərindəki A.Puşkin adına Pedaqoji İnstitutda ali təhsil alıb.

1973-cü ildə namizədlik, 1992-ci ildə doktorluq dissertasiyalarını müdafiə edib. Uzun illər Tbilisi Dövlət Pedaqoji İnstitutunda elmi-pedaqoji fəaliyyət göstərən alim, 1992-ci ildən etibarən elmi fəaliyyətini Bakıda davam etdirib. O, Ali Hərbi Məktəbdə Azərbaycan dili kafedrasına rəhbərlik edib, həmçinin Azərbaycan Respublikasının Prezidenti yanında Ali Attestasiya Komissiyasının Ekspert Şurasının üzvü olub.

Akademik Nizami Cəfərovun da qeyd etdiyi kimi, professor Mədəd Çobanov çoxşaxəli, zəngin və məhsuldar elmi-pedaqoji fəaliyyəti ilə təkcə Azərbaycan dilçiliyində deyil, eləcədə, türkologiya elmində xüsusi mövqe tutan, daim diqqət mərkəzində saxlanılan, yaradıcılığı elmi ictimaiyyətin marağına səbəb olan, alimlər arasında öz səsi, nəfəsi və qələmi ilə fərqlənən alimlərimizdən biri olub.

Professor Mədəd Çobanov 2023-cü il iyunun 3-də Bakı şəhərində vəfat edib.