Daşkənd şəhərindəki “Turan” kitabxanasında Azərbaycanın Özbəkistandakı səfirliyi və bu qurumun tərkibində fəaliyyət göstərən Heydər Əliyev adına Azərbaycan Mədəniyyət Mərkəzinin təşəbbüsü ilə Xocalı soyqırımına həsr edilən tədbir və azərbaycanlı mərhum şair Oqtay İsmayıllının müəllifi olduğu “Mələklərin soyqırımı” poemasının təqdimatı keçirilib.

AZƏRTAC xəbər verir ki, tədbirdən əvvəl Xocalı faciəsi və Qarabağ münaqişəsi ilə bağlı kitab və fotoşəkillərdən ibarət sərgiyə baxış olub.

Tədbirdə çıxış edən alim və tərcüməçi Babaxan Şərif Xocalı faciəsi haqqında məlumat verərək, soyqırımını son onilliklərdə Türk dünyasının ən böyük faciəsi kimi dəyərləndirib.

Səfir Hüseyn Quliyev 32 il əvvəl, fevralın 25-dən 26-na keçən gecə Ermənistan silahlı qüvvələrinin həyata keçirdiyi soyqırımı haqqında danışıb. “Xocalı şəhərini mühasirəyə alan erməni işğalçıları şəhər əhalisini, qocalar, qadınlar və uşaqları xüsusi amansızlıqla qətlə yetirib. Britaniyalı jurnalist Tomas de Vaalın “Xocalıda nə baş verib” sualına Ermənistanın sabiq prezidenti, Xocalı canilərindən Serj Sarkisyan lovğalıqla belə cavab verib ki, “Xocalıya qədər azərbaycanlılar elə bilirdilər ki, bizimlə zarafat etmək olar. Arxayın idilər ki, ermənilər dinc əhaliyə əl qaldırmazlar. Lakin biz bu stereotipi sındırmağı bacardıq”. O zaman Qırmızı Xaç Komitəsi və başqa beynəlxalq təşkilatlar vasitəsilə razılıq əldə edilməsinə və dinc əhalinin çıxarılması üçün xüsusi dəhlizin yaradılması barədə razılığın olmasına baxmayaraq, ermənilər bu dəhlizdən istifadəyə imkan verməyib”, - deyə o əlavə edib.

Azərbaycan Mədəniyyət Mərkəzinin direktoru Samir Abbasov insanlığa qara ləkə olan XX əsrin dəhşətli soyqırımı - Xocalı faciəsi haqqında danışaraq, onun Xatın, Xolokost, Ruanda, Srebrenitsa kimi soyqırımlarından fərqlənmədiyini bildirib. Qeyd edib ki, bu dəhşətli insanlıq dramına dünya dövlətlərinin hüquqi qiymət verməsi önəmlidir.

Özbək alim-dosent Adxambek Alimbekov, “Kitab dünyası” qəzetinin baş redaktoru, şairə Xasiyyət Rüstəm, tarixçi alim Şuxrat Barlas, politologiya üzrə doktor Maxmud Yuldaşev və başqaları Xocalı soyqırımı və erməni təcavüzü barədə danışıblar.

Çıxışçılar Mədəniyyət Mərkəzinin layihəsi ilə nəşr olunmuş “Mələklərin soyqırımı” adlı poema haqqında da fikirlərini bölüşüblər. Əsərdə “Ulu mədəniyyət beşiyi - Azərbaycan”, “Xocalıya aparan yol”, “Azərbaycanlı ananın tərbiyəsi”, “Erməni ananın tərbiyəsi”, “Qiyamətin başlanğıcı”, “Quzğun yığnağı”, “Cənnətdə görüşərik”, “Məhşər”, “Xocalı alov içində”, “Babəkin ikinci edamı”, “Zəncirlənmiş uşaq”, “Xocalı səmasında ruhların söhbəti” və digər bölmələrdə faciənin dəhşətli səhnələri canlandırılıb.

Tədbirin sonunda Əlişir Nəvai adına Daşkənd Dövlət Özbək Dili və Ədəbiyyatı Universitetinin tələbələrinin, habelə Bakı Slavyan Universitetinin Nizami Gəncəvi adına Daşkənd Dövlət Pedaqoji Universitetində təcrübə keçən tələbələrinin ifasında Xocalı faciəsi ilə bağlı bədii kompozisiyalar təqdim edilib.