Bakı Şəhər Mədəniyyət Baş İdarəsinin təşkilatçılığı ilə Əzim Əzimzadənin Mənzil Muzeyində M.S.Ordubadinin Xatirə Muzeyi və C.Cabbarlı ev muzeyi birgə Novruz bayramına həsr olunmuş “Novruz gəlir, yaz gəlir” adlı tədbir keçiriblər.

Tədbirdə mədəniyyət işçiləri, şair və yazıçılar, rəssamlar, 27 nömrəli tam orta məktəbin şagirdləri və digər qonaqlar iştirak ediblər.

Tədbirin bədii hissəsində İbrahim Əbilov adına Mədəniyyət Mərkəzinin Ələsgər Ələkbərov adına xalq teatrının kollektivi,  Novruzun personajları olan Keçəl, Kosa, Bahar qızı çıxış ediblər.

4 nömrəli uşaq Gənclər İnkişaf Mərkəzinin “Dan Ulduzu” rəqs qrupunun ifasında Novruzun və xalqımızın qədim, milli ənənələri ilə bağlı hazırladıqları ədəbi-bədii kompozisiyalar, “Vokal” xor qrupunun ifasında musiqilər, "Təxəyyül ART GROUP" üzvlərinin əl işlərindən ibarət rəsm sərgiləri tədbir iştirakçıları tərəfindən maraqla qarşılanıb.

Keçə sənəti üzrə rəssamlar Mehriban Əliyeva, Maya Babayeva, Nailə Kərimova bu qədim sənət haqqında iştirakçıları məlumatlandırıb daha sonra əl işlərini nümayiş etdiriblər.

Tədbirin sonunda isə muğam ifaçıları çıxış ediblər.