Aprelin 14-də Bakı Şəhər Mədəniyyət Baş İdarəsinin tabeliyində olan Nəriman Nərimanovun xatirə muzeyinin və “Borçalı cəmiyyəti” İctimai Birliyinin birgə təşkilatçılığı ilə Atatürk Mərkəzində “Nəriman Nərimanov: şəxsiyyət və zaman” adlı tədbir keçirilib.

Əvvəlcə tədbir iştirakçıları görkəmli ictimai xadim, yazıçı və maarifçi Nəriman Nərimanovun abidəsini ziyarət edərək önünə əklil və gül-çiçək dəstələri qoyublar.

Nəriman Nərimanovun anadan olmasının 155 illiyi münasibətilə keçirilən tədbirdə elm adamları, tarixçilər, mədəniyyət işçiləri,  nərimanovlar nəslinin nümayəndələri, muzey fəalları, KİV nümayəndələri  və başqa qonaqlar iştirak etdilər.                                                                               

Tədbir Azərbaycan Respublikasının Dövlət Himninin səsləndirilməsi ilə açiq elan edilib və şəhidlərimizin əziz xatirəsi bir dəqiqəlik sükutla anılıb.

Çıxış edənlər N.Nərimanovun ömrünün mühüm hissəsini qəlbən inandığı və həyatının başlıca vəzifəsi sayaraq müqəddəs amala çevirdiyi xalq işi uğrunda ardıcıl mübarizələrdə keçirməsindən, elmin, maarifin və mədəniyyətin inkişafı yolunda var qüvvəsi ilə çalışmasından, dövrün milli məfkurə daşıyıcısı olan şəxsiyyətlərinə ehtiram və qayğı ilə yanaşmasından söhbət açıblar.

Tədbirdə “Nəriman Nərimanov dövrünün böyük mütəfəkkiridir” adlı sərgi nümayiş olunub. N.Nərimanovun “Ucqarlarda inqilabımızın tarixinə dair”, “Hacı Zeynalabdin Tağıyevin 50 illiyi. Məişətə və cəmaətə xidmətləri”, “Tibb və İslam” adlı əsərləri tədbir iştirakçılarına hədiyyə edilib.