Maarifçi, yazıçısı və pedaqoq İbrahim bəy Mehdi bəy oğlu Musabəyov 1880-cı ildə Qutqaşendə (indiki Qəbələ şəhərində) anadan olub. İlk təhsilini doğma Qutqaşendə alan İ.Musabəyov 1898-ci ildə Zaqafqaziya Müəllimlər Seminariyasına daxil olur, 1902-ci ildə oranı bitirir və Şəki şəhərindəki üçüncü rus-tatar məktəbində müəllimliyə başlayır.

1913-cü ildən ədəbi fəaliyyətə başlayan İ.Musabəyovun didaktik, təlim və tərbiyəyə dair hekayələri "Məktəb" jurnalında çap olunub(“Rzanın qutusu”, “Rəhimdil arvad”, “Kor və onun yoldaşı” vəs.). Müəllif bu hekayələrində mülayim bir üslub və sadə dil ilə uşaqlar üçün maraqlı, ibrətamiz əhvalatlar danışır, onları elmə, biliyə, zəhmətə çağırır. İrihəcmli əsərlərini isə müxtəlif nəşriyyatlarda kitabça şəklində çap etdirib.

İbrahim bəy bir nasir olaraq sonrakı kitabları ilə şöhrət qazanıb. Onun “Cəhalət fədailəri”, “Xoşbəxtlər”, “Gözəllərin vəfası” kimi povestləri və nəhayət, “Neft və milyonlar səltənətində” adlı romanı bitkin və kamil əsərlər kimi zamanının maraqlı və səciyyəvi məsələlərini təsvir edir.

Onun ədəbi irsi içərisində ideya və məzmunu ilə nəzəri daha çox cəlb edən və bu gün də aktuallığını itirməyən, ilk dəfə 1916-cı ildə kitab şəklində çap olunmuş “Neft və milyonlar səltənətində” povestidir. Bu, inqilaba qədər Azərbaycan bədii nəsrində neft sənayesi sahiblərinin və burjua əxlaqının, pul hakimiyyətinin ifşasına həsr olunmuş əsərlər içərisində xüsusi yer tutur. Yazıçının “Neft və milyonlar səltənətində” povesti tez bir zamanda ictimaiyyətin nəzərini cəlb edir. 1916-cı ildə həmin povestin əsasında A.D.Panova-Potyomkinanın ssenarisi üzrə “Filma” fransız kino şirkəti dörd seriyadan ibarət kinofilm çəkir ki, burada rus kino ustaları ilə yanaşı, məşhur Azərbaycan aktyoru Hüseyn Ərəblinski, xanəndə Cabbar Qaryağdıoğlu, tarzən Qurban Primov, Mirmahmud Kazımovski də iştirak ediblər. Həmçinin yazıçının əsəri əsasında 1980-ci ildə “Qızıl uçurum” tammetrajlı bədii filmi də çəkilib.

İbrahim bəy Musabəyov 14 sentyabr 1942-cil ildə Karakanda şəhərində vəfat edib.