Bakı Şəhər Mədəniyyət Baş İdarəsinin tabeliyində olan Suraxanı rayon Heydər Əliyev Mərkəzində 18 Oktyabr - Dövlət Müstəqilliyinin Bərpası Günü ilə əlaqədar “Müstəqilliyimiz bizim ən böyük sərvətimizdir” adlı tədbir keçirilib.

Tədbirdə rayon idarə və müəssisələrinin nümayəndələri, məktəblilər iştirak ediblər.

İlk olaraq Azərbaycan Respublikasının Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad edilib.

Tədbirdə çıxış edənlər qeyd ediblər ki, 1991-ci il oktyabrın 18-də Azərbaycan Respublikası Ali Soveti tərəfindən “Azərbaycan Respublikasının Dövlət Müstəqilliyi haqqında” Konstitusiya Aktı qəbul olunub. Bu tarixi sənədlə xalqımız bir daha öz müstəqilliyini bərpa edərək dövlətçilik tarixində yeni və şərəfli bir mərhələyə qədəm qoyub. Müstəqilliyin bərpası, xalqımızın əsrlər boyu azadlıq və suverenlik uğrunda apardığı mübarizənin məntiqi nəticəsi, milli iradə və birliyin təntənəsi idi. Lakin müstəqilliyin ilk illəri ağır sınaqlarla müşayiət olunub. Daxili çəkişmələr, idarəetmədə xaos, Ermənistanın hərbi təcavüzü və iqtisadi tənəzzül ölkəni böyük təhlükə qarşısında qoyub. Belə bir çətin zamanda Azərbaycan xalqının tələbi ilə Ulu Öndər Heydər Əliyev yenidən hakimiyyətə qayıdaraq dövlətimizi dağılmaqdan xilas edib. Heydər Əliyev qısa müddətdə ölkədə sabitliyi bərpa edib, hüquqi, siyasi və iqtisadi islahatların əsasını qoyub, Azərbaycanın beynəlxalq nüfuzunu yüksəldib.

18 Oktyabr - Dövlət Müstəqilliyinin Bərpası Günü, xalqımızın azadlıq ruhunu, milli həmrəyliyini və dövlətçiliyinə sarsılmaz sədaqətini simvolizə edir.

Sonda qonaqlar Ümummilli Lider Heydər Əliyevin zəngin və çoxşaxəli irsini əks etdirən ekspozisiya ilə tanış olublar.