Azərbaycan Milli Xalça Muzeyində “İkinci həyat” adlı xalça üzərində rəsm sərgisinin açılış mərasimi keçirilib.

AZƏRTAC xəbər verir ki, “Arts Council Azerbaijan” və Azərbaycan Milli Xalça Muzeyinin təşkilatçılığı, “European Crafts Alliance” və ICOM Azərbaycan Milli Komitəsinin dəstəyi ilə reallaşan layihənin müəllifi Sona Quliyevadır.

Tədbirdə çıxış edən muzeyin direktoru Əminə Məlikova bildirib ki, sərgidə Azərbaycanın ayrı-ayrı regionlarına aid bədii, tarixi, elmi əhəmiyyət kəsb etməyən, zədələnmiş və ya istifadəyə yararsız xalçalar üzərində peşəkar rəssamların müxtəlif janrlarda çəkdiyi 30-dan artıq rəsm nümayiş olunur.

“Bu əsərlərdə 1980-2000-ci illərdə toxunmuş ənənəvi xalçalar rəssamların özünəməxsus yanaşma tərzi əsasında yeni bədii üslublarla sintez edilərək daha da zənginləşdirilib. Təsviri sənət nümunələrində Qarabağ motivləri və ölkəmizin rəmzi sayılan nar elementləri müasir interpretasiyada təqdim edilib. Layihə BMT-nin Dayanıqlı İnkişaf Məqsədləri çərçivəsində məsuliyyətli istehlak və istehsal (SDG 12), iqlim dəyişikliyi ilə mübarizə (SDG 13) prinsiplərinə uyğun həyata keçirilir”, - deyə Ə.Məlikova əlavə edib.

“Arts Council Azerbaijan” təşkilatının rəhbəri Dadaş Məmmədov layihənin məqsədindən söhbət açıb. O, diqqətə çatdırıb ki, Azərbaycan xalça sənətinin qorunması, onun müasir incəsənət kontekstində yenidən ifadə olunması, eyni zamanda, ekoloji şüurun inkişafı, təkrar istifadənin sənət vasitəsilə təşviqi əsas məsələdir. D.Məmmədov qeyd edib ki, qarşıya qoyulan əsas hədəf yerli rəssamlarla yanaşı, beynəlxalq sənət ictimaiyyətini bu yaradıcılıq prosesinə cəlb etmək, xalqımızın xalça sənətini dünyada daha geniş tanıtmaqdır.

Milli Xalça Muzeyinin uşaq muzeyi şöbəsinin müdiri Təranə Əliyeva sərgi ilə bağlı təəssüratlarını AZƏRTAC-ın müxbiri ilə bölüşüb: “Bu sərgidə iştirakım mənim üçün çox maraqlı və yaddaqalan təcrübə oldu. İlk dəfə olaraq, xalça üzərində rəsm əsəri işlədim. Əsərimdə milli zinət əşyalarımızdan biri olan piyalənzəng təsvir olunub. Bu sırğa növü xalqımızın qədim və zəngin mədəniyyətini əks etdirən unikal bəzək əşyalarındandır”.

Kətandan fərqli olaraq, xalça üzərində işləməyin çətin və fərqli bir proses olduğunu vurğulayan T.Əliyeva deyib: “Mən akril boyalardan istifadə etməklə xalçaya heç bir ziyan vurmadan əsərimi ərsəyə gətirdim. Xalçanın bəzi ornamentlərini saxlayaraq kompozisiyamı qurmağa çalışdım. Qeyd edim ki, biz əsasən restavrasiyaya yararsız xalçalar üzərində işləyirdik və bu xalçaların rəng baxımından daha əlverişli hissələrini qorumağa xüsusi diqqət yetirmişik”.

Tədbirin bədii hissəsində “Muğam” Televiziya Müsabiqəsinin qalibi, xanəndə Nisbət Sədrayeva səhnədə ifası ilə yer alıb. Onu tar və kamançada Rüstəm Müslümov və Elnur Salahov, balabanda Rəfail Əsgərov, nağarada isə Səyyar Teymurov müşayiət ediblər.

Həmçinin Respublika Uşaq-Gənclər və İnkişaf Mərkəzinin “Qavaldaş” qrupu da musiqi nömrəsini təqdim edib. Sərgi aprelin 27-dək davam edəcək.