“Abidələrə qayğı – Bakı şəhərində heykəltaraşlıq əsərlərinin təmizlənməsi və bərpası” layihəsi çərçivəsində növbəti bərpa-təmizləmə işləri Milli Qəhrəman Albert Aqarunovun şərəfinə ucaldılmış heykəlin üzərində aparılıb.

Mədəniyyət Nazirliyindən AZƏRTAC-a bildirilib ki, təbiətin, aqressiv mühitin yaratdığı müxtəlif rəng dəyişmələri, korroziyaların aradan qaldırılması və heykəlin ilkin vəziyyətinə qaytarılması üçün onun təmizlənmə prosesi başlanılıb. Heykəl yad təsirlərdən, çirklərdən təmizlənərək ilkin vəziyyətinə qaytarılır və sonrakı mərhələdə qaydalara uyğun olaraq, tonlama prosesi başlanılır. Bundan sonra heykəlin yad təsirlərdən uzun müddət qorunması məqsədilə ona qoruyucu qat çəkiləcək. Heykəllərin unikallığının qorunması və təhlükəsizliyinin təmin olunması məqsədilə peşəkar heykəltaraşların nəzarəti ilə texniki heyət tərəfindən görülən işlər bütün standartlara uyğun və keyfiyyətlə həyata keçirilir.

Heykəl 2019-cu ildə Bakı şəhərinin Nərimanov rayonu ərazisində ucaldılıb. Layihənin icrası Xalq rəssamı Ömər Eldarov tərəfindən akademiyanın müəllimləri - Rahib Qarayev və Zamik Rzayevə həvalə edilib. Heykəlin kompozisiyası və eskiz ideyası da Rahib Qarayev və Zamik Rzayevə aiddir. Abidədə əks olunan qayadan çıxmaq təsviri Qarabağın simvoludur. Texniki cəhətdən tankı göstərmək mümkün olmadığına görə, qayadan istifadə edilərək fraqment verilib.

Albert Aqarunov 1969-cu il aprelin 15-də Bakının Əmircan qəsəbəsində, yəhudi ailəsində anadan olub. 1992-ci il mayın 8-də Şuşa uğrunda gedən döyüşlərdə şəhid olub.