XƏBƏRLƏR
MƏLUMAT
Milli Kitabxanada “Professor Asif Rüstəmli” adlı kitab sərgisi açılıb
ÜMÜMİ XƏBƏRLƏR
16/02/2024 14:06

Fevralın 16-da görkəmli ədəbiyyatşünas alim, filologiya elmləri doktoru, professor Asif Rüstəmlinin 70 yaşı tamam olur. Bu münasibətlə Milli Kitabxanada professorun yaradıcılığını əks etdirən ənənəvi kitab sərgisi açılıb.

Kitabxanadan AZƏRTAC-a bildirilib ki, sərgidə müəllifin əsərləri, tərcümə etdiyi, rəy və ön söz yazdığı kitablar, tərtibçi və redaktoru olduğu ədəbiyyatlar nümayiş etdirilir.

Sərgi bir həftə ərzində ziyarətçilər üçün açıq olacaq.

Qeyd edək ki, Asif Rüstəmli 15 kitabın, 350-dən çox elmi, publisistik məqalənin və məruzənin müəllifi, 20 kitabın tərtibçisi, 2 kitabın tərcüməçisi, çoxsaylı kitabların redaktoru və rəyçisi olub, onlara ön söz yazıb. Elmi məqalələri xarici ölkələrdə türk, fars, rus, polyak və macar dillərində çap olunub. Ssenariləri əsasında “Günəş Şərqdən doğur”, “İstiqlal fədaisi”, “Nurlu gələcək naminə” sənədli filmləri çəkilib, Moskvanın “Kinoprodukt” Studiyasının çəkdiyi “Əfsanənin əks üzü” seriyasından “26 Bakı komissarı” sənədli filminin elmi məsləhətçisi olub və filmdə yer alıb.

1992-1996-cı illərdə Azərbaycan Televiziyasında yayımlanan “Yaddaş” və “Tarix bizə nə deyir” verilişlərinin ssenari müəllifi və aparıcısı olub.

Baxış sayı: 164