AZƏRTAC xəbər verir ki, əvvəlcə soyqırımı qurbanlarının xatirəsi bir dəqiqəlik sükutla yad edilib.

Milli Kitabxananın direktoru, professor Kərim Tahirov qeyd edib ki, Ulu Öndər Heydər Əliyevin 26 mart 1998-ci il tarixli Sərəncamı ilə 31 Mart- Azərbaycanlıların Soyqırımı Günü kimi qeyd olunur.

Vurğulanıb ki, erməni millətçiləri tarixin müxtəlif mərhələlərində mifik ideyalarını gerçəkləşdirmək məqsədilə soydaşlarımıza qarşı etnik təmizləmə və soyqırımlar həyata keçiriblər. Daşnak-bolşevik silahlı dəstələri tərəfindən xüsusi qəddarlıqla törədilmiş qırğınlar zamanı Azərbaycanın müxtəlif ərazilərindən 30 mindən çox azərbaycanlı qətlə yetirilib, 10 minlərlə insan öz torpaqlarından qovulub: “Bu gün biz 31 mart soyqırımına dair daha çox kitablar yazmalı, müxtəlif dillərə tərcümə etməli və erməni daşnakları tərəfindən azərbaycanlıların başına gətirilən bəlaları, faciələri geniş təbliğ etməliyik”.

Tədbirdə mart soyqırımı və ya mart hadisələri zamanı Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı soveti və daşnak erməni silahlı dəstələrinin azərbaycanlılara qarşı törətdikləri qırğınlardan danışılıb.

Azərbaycan Milli Kitabxanasının əməkdaşları tərəfindən “31 Mart - Azərbaycanlıların Soyqırımı Günü” adlı elektron məlumat bazası, “31 Mart -tarixi yaddaşımızdan silinməyən soyqırımı” adlı virtual sərgi onlayn rejimdə, eləcə də “31 Mart- Azərbaycanlıların Soyqırımı Günüdür” adlı ənənəvi kitab sərgisi istifadəçilərə təqdim olunub.

Elektron məlumat bazasında “Rəsmi sənədlər”, “Görkəmli şəxslər Mart soyqırımı haqqında”, “Kitablar”, “Məqalələr”, “Filmoqrafiya”, “Soyqırımı yaddaşlarda” və s. özündə əks etdirən materiallar nümayiş edilir.

Elektron məlumat bazası ilə tanış olmaq istəyənlər https://anl.az/soyqirim/ linkindən istifadə edə bilərlər.

Virtual sərgidə mart soyqırımı haqqında dövri mətbuatda dərc olunmuş məqalələr, çap olunmuş kitablar, fotolar nümayiş olunur.

Virtual sərgi ilə tanış olmaq istəyənlər https://anl.az/el/vsb/31-Mart_tarixi_yaddashimizdan_silinmeyen_soyqirim/index.htm linkindən istifadə edə bilərlər.

Ənənəvi kitab sərgisində isə mart soyqırımı, eləcə də, tarix boyu erməni millətçilərinin xalqımıza qarşı törətdiyi qətliamlar haqqında həqiqətləri dünyaya çatdıran Azərbaycan və müxtəlif dillərdə çap olunmuş əsərlər təqdim edilir.