Mayın 27-də Bakı Şəhər Mədəniyyət Baş İdarəsinin tabeliyində olan Səbail rayon Mərkəzləşdirilmiş Kitabxana Sisteminin Mərkəzi Kitabxanasında “Mən, Lalə, bir də Şerlok Holms” serialının yaradıcı və aktyor heyəti ilə görüş keçirilib.

Görüşdə Azərbaycan Milli Konservatoriyası tərkibində İncəsənət Gimnaziyasının şagirdləri və kiçik yaşlı oxucular iştirak ediblər.

Tədbirdə serialın baş qəhrəmanları haqqında ətraflı məlumat verilib. Qeyd olunub ki, serial  Elm və Təhsil  Nazirliyinin dəstəyi  ilə KAC Qrup Media tərəfindən istehsal olunub, ictimai televiziyanın efirində nümayiş olunub. 12 bölümdən ibarət olan serial tamaşaçılar tərəfindən maraqla qarşılanıb.

Görüşdə yaradıcı heyətə və balaca aktyorlara suallar ünvanlanıb, kadr arxası baş verən maraqlı anlardan danışılıb, xatirə şəkilləri çəkilib.

Həmçinin tədbirdə “Cırtdanın sehrli papağı” layihəsinin qaliblərinin mükafatlandırılması həyata keçirilib.

Qeyd edək ki, tədbirin keçirilməsində əsas məqsəd 1 İyun-Uşaqların Beynəlxalq Müdafiəsi Günü ərəfəsində uşaqları sevindirmək, onları sevimli qəhrəmanları ilə görüşdürməkdir.