Mayın 19-da Bakı Şəhər Mədəniyyət Baş İdarəsinin tabeliyində olan Səbail rayon Mərkəzləşdirilmiş Kitabxana Sisteminin 1 №-li kitabxana filialı Xalq şairi,  ictimai xadim, dramaturq  Rəsul Rzanın anadan olmasının 115 illik yubileyinə həsr olunmuş tədbir keçirib.

"Mən kökümlə bu torpağa bağlıyam" adlı tədbirdə şairin ailə üzvləri, Bülbül adına Orta İxtisas Musiqi Məktəbinin müəllim və şagirdləri, mədəniyyət işçiləri iştirak ediblər.

Tədbirdə dahi şair Rəsul Rzanın həyat və yaradıcılığı haqqında videoçarx nümayiş etdirilib, yaradıcılığı haqqında geniş məlumat verilib. Qeyd olunub ki,  Rəsul Rza yaradıcılığı milli-mənəvi dəyərlərə, vətənpərvərlik və vətəndaşlıq hisslərinə  söykənərək Azərbaycan oxucusuna geniş düşünmək bacarığı aşılayıb, polemik ruh və fikir hərəkəti gətirib.

Bədii hissədə şairin yaradıcılığından şeirlər səsləndirilib və sözlərinə bəstələnmiş mahnılar ifa edilib.

Həmçinin kitabxanda şairin kitablarından ibarət sərgi də nümayiş olunub.

Sonda Bülbül adına Orta İxtisas Musiqi Məktəbinin şagirdlərinə tədbirdə fəal iştiraklarına görə kitabxana tərəfindən Diplom təqdim edilib.