MDB Dövlətlərarası Humanitar Əməkdaşlıq Fondunun “Forum Plyus” jurnalında Azərbaycanın işğaldan azad edilmiş və bu il Birliyin mədəniyyət paytaxtı elan olunmuş Laçın rayonu haqqında “Laçınlı Yusif” sərlövhəli material dərc olunub. Yazı laçınlı rəssam Yusif Mirzə ilə geniş müsahibəni və rəssamın tablolarının fotoşəkillərini ehtiva edir.

AZƏRTAC xəbər verir ki, müsahibənin giriş hissəsində qeyd olunub: “Azərbaycanlı rəssam Yusif Mirzə əslən dağ şəhəri olan Laçındandır. Bu il Birliyin mədəniyyət paytaxtı statusunu almış bu əsrarəngiz məkan haqqında təqribən 200 il əvvələ aid məşhur “Laçın” mahnısı da var. Bu mahnı Laçının təbiəti kimi melodik, sakitləşdiricidir”.

Qeyd olunub ki, Yusif Mirzə doğma Laçını öz əsərlərində vəsf edir. Rəssam işğaldan sonra ata-baba yurduna getmək istədiyini, otuz ildən artıq davam edən həsrətə son qoymaq arzusunun yerinə yetdiyini deyib. O, laçınlıların milli geyim tərzi, adət-ənənələri, uşaqlıq illərində yaddaşına həkk olunmuş bayramlar, kəlağayı ilə rəqs edən qızlardan bəhs edib. Yusif Mirzə əlavə edib: “Dağda qədim alban kilsəsi var idi. Orada hər şeyi bir növ möcüzə kimi qəbul edirdim...Yay tətilində günlərimiz Laçının mirvarisi olan Qaragöl gölünün sahilində keçirdi. 1987-ci ildən bu göl nadir təbiət abidəsi kimi tanınaraq Qaragöl Dövlət Təbiət Qoruğunun tərkibinə daxil edilib. Bütün bu gözəllik uşaqlıqda mənə nağıl kimi gəlirdi”.

Rəssam deyir: “Təəssüf ki, kəndlərdə yalnız xarabalıqlar və xatirələr qaldı. Körpə ikən xalçalarda, kilimlərdə oynayıb böyümüşəm, onların naxışları mənə təsir edirdi. Onlar bütün nağıl aləmini təxəyyülümdə sanki canlı əks etdirirdi”. Yusif Mirzə vurğulayır ki, bütün bu təəssüratlar böyüyəndə onda rəssam olmaq arzusu doğurdu. O, həmçinin sənət sevgisinin formalaşmasında milli musiqidən – Qara Qarayev, Fikrət Əmirov, Vaqif Mustafazadə kimi görkəmli şəxsiyyətlərdən ilham aldığını deyib.

Düşmən işğalından azad edilmiş doğma yurduna son səfərini xatırlayan rəssam qeyd edib: “Keçən ilin iyul ayında Laçında oldum. Doğma yurdumla bağlı yaradıcılığım da məhsuldar olub - 40 rəsm və dörd heykəl yaratmışam, 90-a yaxın eskiz hazırladım. Həm işğaldan əvvəlki dövrdə, həm də Laçının azad edilməsindən sonra başa çatdırılmış 100-ə yaxın tablo çəkmişəm. Ümid edirəm ki, gələcəkdə onları fərdi sərgidə təqdim edə biləcəyəm. Rəsmlərimdə yaşadıqlarımı çatdırmağa çalışıram. Bu, mənə motivasiya verir. Doğma torpaqlarımızın azad edilməsi, kiçik vətənimi yenidən görmək imkanı məni yeni yaradıcılıq uğurlarına ruhlandırır”.