XƏBƏRLƏR
MƏLUMAT
Marneulidə Gürcüstanın və Azərbaycanın Müstəqillik günlərinə həsr olunmuş rəsm sərgisi açılıb
ÜMÜMİ XƏBƏRLƏR
29/05/2024 09:21

Marneulidə fəaliyyət göstərən Gürcüstan Azərbaycanlılarının İnteqrasiya Mərkəzində (GAİM) Gürcüstanın və Azərbaycan Respublikasının Müstəqillik günləri qeyd edilib.

AZƏRTAC xəbər verir ki, GAİM-in rəhbərliyi və şagirdlər, eləcə də Azərbaycan Respublikasının Diasporla İş üzrə Dövlət Komitəsinin məsul əməkdaşı Sabit Məmmədov, ziyalılar mayın 28-də Tbilisidə Heydər Əliyev adına parka gəliblər. Onlar müasir müstəqil Azərbaycan dövlətinin banisi Ümummilli Lider Heydər Əliyevin abidəsinin önünə əklil və gül dəstələri qoyub, xatirəsini ehtiramla yad ediblər.

Sonra tədbir iştirakçıları şəhərin Botanika bağında yerləşən, görkəmli azərbaycanlıların panteonunda Azərbaycan Xalq Cümhuriyyətinin qurucularından olan Fətəli xan Xoyski və Həsən bəy Ağayevin xatirəsini anıblar.

Daha sonra tədbir Marneulidə davam edib.

GAİM-də Gürcüstan və Azərbaycanın Respublikasının Müstəqillik Gününə həsr olunmuş “Azadlıq rəqsi” adlı rəsm sərgisi açılıb.

GAİM-in İcraçı direktoru Murad Muradov çıxış edərək hər iki dövlətin müstəqillik uğrundakı şanlı mübarizəsi, dövlətçilik yolunda atılan böyük və qətiyyətli addımlar və qazanılan uğurlar barədə məlumat verib.

Sabit Məmmədov Dövlət Komitəsinin sədri Fuad Muradovun salamlarını və təbriklərini çatdırıb, gənc rəssamlara uğurlar arzulayıb, gələcəkdə onların təcrübəli rəssam kimi inkişaf edəcəklərinə ümid bəslədiyini bildirib.

Tədbirdə Gürcüstan Rəssamlar İttifaqının üzvü rəssam Rizvan İsmayıl, Azərbaycanın Əməkdar jurnalisti, Gaxa.ge saytının rəhbəri Nizami Məmmədzadə və Marneuli Demokratik Məşğulluq Mərkəzinin rəhbəri Mariam Samxaradze çıxış edərək sərgidə nümayiş etdirilən rəsm əsərlərinin özəlliyindən danışıb, gənc rəssamlara uğurlar diləyiblər.

Sərgidə GAİM-in rəsm kursunun müəllimləri - Aylin Qasımova və Aysun Çobanova ilə yanaşı şagirdlər - Əfsanə Musayeva və Aylin Əsgərovanın 30-a yaxın əl işi sərgilənib.

Xətayi Əzizov

AZƏRTAC-ın xüsusi müxbiri

Tbilisi

Baxış sayı: 120