Maqsud İbrahimbəyov Yaradıcılıq Mərkəzində Elm və Təhsil Nazirliyi və “NG Creators Club”ın dəstəyi ilə məşhur fantastika yazıçısı və astrofizik, bakılı Pavel Amnuelin “Metronom” elmi fantastika hekayəsi əsasında ən yaxşı esse üzrə beynəlxalq ədəbi müsabiqənin yekunlarına həsr olunmuş görüş keçirilib.

AZƏRTAC xəbər verir ki, tədbiri açan Mərkəzin direktoru Anna İbrahimbəyova müsabiqənin məqsədi haqqında danışıb.

Qeyd olunub ki, müsabiqə bakılı fantastika yazıçılarının son onilliklərdəki əsərlərini tələbələr arasında təbliğ etmək məqsədi daşıyan “Fantastik irs” ədəbi layihəsi çərçivəsində üçüncü dəfə keçirilir.

Tədbir zamanı Maqsud İbrahimbəyovun yaradıcılığı haqqında film, həmçinin Pavel Amnuelin müsabiqə iştirakçılarına videomüraciəti nümayiş etdirilib.

Münsiflər heyətinə Maqsud İbrahimbəyov Yaradıcılıq Mərkəzinin direktoru, Azərbaycan Fotoqraflar Birliyinin üzvü Anna İbrahimbəyova, AMEA-nın Nizami Gəncəvi adına Ədəbiyyat İnstitutunun şöbə müdiri professor Gülər Abdullabəyova, Rusdilli Təhsil Müəssisələrinin Müəllimləri Assosiasiyasının sədri Lyubov Yakunina, “Azərbaycanda rus dili və ədəbiyyatı” jurnalının baş redaktoru Flora Naci, Azərbaycan Yazıçılar Birliyinin üzvləri – elmi fantastika yazıçıları Pavel Amnuel və Aleksandr Hakimov, Moskva Dövlət Universitetinin Əməkdar elmi işçisi, psixoloq Aleksandr Voyskunski, art-direktor, Azərbaycan Fotoqraflar İttifaqının üzvü Rüstəm Hüseynov və “NG Creators Club”ın direktoru Natiq Əliyev daxil olub.

Müsabiqədə Bakının ümumi təhsil məktəblərinin şagirdləri ilə yanaşı, Bakı Dövlət Universitetinin və Bakı Musiqi Akademiyasının tələbələri də iştirak ediblər.

Tədbirdə, həmçinin iştirakçıların yadplanetlilərin ehtimal edilən səfər yerlərini və İçərişəhərdə kosmik vaxtının hesablanması üçün “Metronom” qurğusunun mümkün koordinatlarını əks etdirən fotoşəkillərdən ibarət təqdimat keçirilib. Anna İbrahimbəyova bu mövzuda öz müəllif şərhini təqdim edib.

Qeyd edək ki, bu il Pavel Amnuel üçün yubiley ilidir.

Daha əvvəl Respublika Uşaq-Gənclər İnkişaf Mərkəzinin təşəbbüsü ilə onun 80 illik yubileyinə həsr olunmuş tədbir keçirilib. Bundan əlavə, “Mir literaturı” nəşrinin baş redaktoru Elmar Şeyxzadə və Britaniya Poeziya Cəmiyyətinin üzvü, şairə Leyli Salayeva arasında görüş keçirilib.

Görüşün sonunda fantastika yazıçısı Aleksandr Hakimovun yaradıcılığına həsr olunmuş ən yaxşı esse üzrə yeni ədəbi müsabiqəyə start verilib. Müsabiqə onun 2025-ci ildə qeyd ediləcək 65 illik yubileyinə həsr olunub.