İspaniyadakı Diplomatların Beynəlxalq Assosiasiyasının təşkilatçılığı və Madrid şəhər bələdiyyəsinin inzibati dəstəyi ilə İspaniya paytaxtında növbəti “KERMES 2025” Beynəlxalq Xeyriyyə Bazarı keçirilib.

Azərbaycanın İspaniyadakı səfirliyindən AZƏRTAC-a bildirilib ki, Madridin tarixi əhəmiyyətə malik “Cibeles” Sarayında İspaniyada akkreditə olunmuş 40-a yaxın xarici ölkənin diplomatik nümayəndəliklərinin təmsilçilərinin iştirakı ilə keçirilən tədbirdə ölkələrin milli mədəniyyət nümunələri, mətbəxi və musiqisi nümayiş etdirilib.

Azərbaycanın İspaniyadakı səfirliyinin təşkilatçılığı və Azərbaycan Respublikasının İxracın və İnvestisiyaların Təşviqi Agentliyinin (AZPROMO) dəstəyi ilə bu beynəlxalq bazarda ölkəmiz böyük stendlə təmsil olunub.

Rəngarəngliyi, zərifliyi və unikallığı ilə seçilən Azərbaycan stendi həm tədbir iştirakçılarının, həm də ziyarətçilərin böyük marağına səbəb olub. Milli ornamentlərlə bəzədilmiş stenddə ölkəmizin tarixi, mədəniyyəti, musiqisi, mətbəxi ilə bağlı müxtəlif suvenirlər, dadlı təamlar və nəşrlər nümayiş etdirilib. Azərbaycan stendinə gün ərzində çoxsaylı ziyarətçi yaxınlaşaraq ölkəmizin qədim tarixi və zəngin mədəniyyəti barədə ətraflı məlumat əldə edib.

Budəfəki xeyriyyə bazarında ziyarətçilərə, həmçinin “Made in Azerbaijan” brendinin məhsulları, təravətli çaylar, bal, məxsusi meyvə şirələri, quru meyvələr, şərablar təqdim olunub. Ziyarətçilər Azərbaycanın ipək kəlağayılarını, füsunkar süfrə və çay dəstlərini, milli çalarlarda tərtib olunmuş çantaları və digər suvenirləri böyük həvəslə əldə edib, eləcə də şəkərbura, paxlava, qoğal, Naxçıvan çöçəsi, İrəvan kətəsi, Ordubad dürməyi və digər ənənəvi təamlardan dadıblar.

Xeyriyyə bazarının bədii hissəsində İspaniyada yaşayan rəqqasə həmyerlimiz tərəfindən “Sarı gəlin” xalq mahnısının sədaları altında rəqslərimiz təqdim olunub.

Qeyd edək ki, multikulturalizm mühitində fəaliyyət göstərən və xeyriyyəçilik məqsədilə keçirilən bu bazarda əldə edilən gəlir müxtəlif sosial layihələri dəstəkləmək məqsədilə Kraliça Sofiya Fondunun hesabına köçürülür.