Azərbaycan Respublikasında 2025-ci ilin “Konstitusiya və Suverenlik İli” elan edilməsi münasibətilə mayın 3-də Qazaxıstanın Aktau şəhərində yerləşən Dostluq Evində bayram konserti təşkil olunub.

AZƏRTAC xəbər verir ki, konsertdən əvvəl Azərbaycanın Aktau şəhərindəki baş konsulu Ayxan Süleymanlı, Manqistau vilayət Maslixatının sədri Janbırbay Matayev, “Azərbaycan Mərkəzi”nin rəhbəri İlkin Orucov və “Dostluq” Etnomədəni İctimai Birliyinin sədri Şəmsəddin Hüseynov çıxış ediblər.

Ayxan Süleymanlı çıxışında 2025-ci ilin Azərbaycanda “Konstitusiya və Suverenlik İli” elan olunması, Konstitusiyanın qəbul tarixi və 2023-cü il sentyabrın 19-20-də keçirilən antiterror əməliyyatı nəticəsində ölkənin ərazi bütövlüyü və suverenliyinin tam təmin olunması barədə iştirakçılara ətraflı məlumat verib.

Manqistau vilayət Maslixatının sədri Janbırbay Matayev Azərbaycan–Qazaxıstan dostluğunun tarixi, dövlət başçıları arasında formalaşmış etimada əsaslanan münasibətlər və ölkələr arasındakı əlaqələrdən danışıb, “Konstitusiya və Suverenlik İli” münasibətilə Azərbaycan xalqını təbrik edib.

“Dostluq” Etnomədəni İctimai Birliyinin sədri Şəmsəddin Hüseynov Qazaxıstanda yaşayan digər azsaylı xalqlarla yanaşı, azərbaycanlılara da göstərilən səmimi münasibəti yüksək qiymətləndirib və yaradılmış şəraitə görə ölkə və vilayət rəhbərliyinə minnətdarlığını bildirib.

“Azərbaycan Mərkəzi”nin rəhbəri İlkin Orucov isə çıxışında elmi-praktik konfransın və konsertin keçirilməsinə dəstək göstərən qurumlara təşəkkürünü bildirib, bu cür tədbirlərin ölkələr arasında mədəni əlaqələrin inkişafına verdiyi töhfəni vurğulayıb.

Konsertdə Ş.Yessenov adına Xəzər Texnologiya və Mühəndislik Universitetinin tələbələri Azərbaycan və Qazax xalqlarına məxsus milli rəqsləri ifa ediblər, mahnılar oxuyublar. Həmçinin Azərbaycandan gəlmiş müğənni Kərim Abbasov və yerli “Dostluq” qrupu müxtəlif mahnılar təqdim ediblər.

Elşən Rüstəmov

AZƏRTAC-ın xüsusi müxbiri

Astana