Bakı Şəhər Mədəniyyət Baş İdarəsinin tabeliyində olan Yasamal rayon Mərkəzləşdirilmiş Kitabxana Sisteminin Mərkəzi Kitabxanasında həyata keçirilən “Kitabxanaya kitab hədiyyə edirik” layihəsi uğurla davam edir.

Layihə çərçivəsində Mərkəzi Kitabxananın Fəxri oxucusu, şair, yazıçı-publisist, Əməkdar mədəniyyət işçisi Xuraman İsmayılova “Görkəmli dövlət xadimi Heydər Əliyev”, “Şuşa 270”, “Qərbi Azərbaycan”, “Azərbaycan ekologiyası” biblioqrafik göstəriciləri və özünün 65 illik yubileyinə həsr olunmuş “Xuraman İsbi qızı İsmayılova” biblioqrafik göstəricini kitabxanaya hədiyyə edib.

“Görkəmli  dövlət xadimi Heydər Əliyev” biblioqrafik göstərici Ümummilli lider Heydər Əliyevin 100 illik yubileyinə, “Şuşa 270” biblioqrafik göstəriciyə Şuşanın tarixinə, görkəmli şəxsiyyətlərinə həsr olunmuş məlumat mənbələri daxil edilib.

“Qərbi Azərbaycan” biblioqrafik göstəricidə Qərbi Azərbaycanın tarixi, coğrafiyası, ədəbiyyatı və incəsənətinə dair kitab və məqalələr elm sahələri üzrə qruplaşdırılıb.

“Yaşıl dünya naminə həmrəylik ili”nə həsr olunmuş AMEA-nın Mərkəzi Elmi Kitabxanasının hazırladığı “Azərbaycan ekologiyası” biblioqrafik göstəricidə isə ətraf mühitlə bağlı kitab və məqalələr, dissertasiya və avtoreferatlar əlifba sırası ilə qruplaşdırılıb.

“Xuraman İsbi qızı İsmayılova” biblioqrafik göstəricisi şair, yazıçı-publisist, Əməkdar mədəniyyət işçisi Xuraman İsmayılovanın 65 illik yubileyinə həsr olunub. Kitabda X.İsmayılovanın əsərlərinin biblioqrafiyası, tərtib etdiyi və redaktoru olduğu kitablar, dövri mətbuatda və məcmuələrdə çap olunmuş məqalələri, başqa dillərdə əsərləri xronoloji ardıcıllıqla qruplaşdırılıb.

Biblioqrafik göstəricilərlə Yasamal rayon MKS-nin Mərkəzi Kitabxanasında tanış olmaq mümkündür.