“İranə Qasımova ilə açıq poeziya mikrofonu” layihəsinin növbəti tədbiri baş tutub. Layihə 5 illiyini qeyd edib.

AZƏRTAC xəbər verir ki, tədbir çoxlu sayda qonaqları - müasir Azərbaycan şairlərini, oxucularını, poeziyasevərləri, mədəniyyət və incəsənət xadimlərini bir araya toplayıb. Gecədə Natali, Leyli Salayeva, Eldar Cahangirbəyov, İlmira Odinayeva, Tatyana Avand, Əzizə Laym, Arzu Manaflı, Natəvan-san, Yuliya Motorina, Nərmin Həsənova, Nərgiz Tahirova, Natella Kərimova, Naza Həsənova, Nəzrin Cəfərli şeirlər oxuyublar.

Layihənin müəllifi İranə Qasımovanın AZƏRTAC-a verdiyi məlumata görə, “Açıq poeziya mikrofonu” layihəsinə 5 il əvvəl, 2019-cu il sentyabrın 3-də start verilib. Layihə çərçivəsində həm təcrübəli, həm də yeni qiraətçilər, müəlliflər, şairlər tədbirin qonaqları ilə yaradıcılıqlarını bölüşmək imkanı əldə edirlər. Bu illər ərzində hər axşam layihəyə yeni istedadlı şairlər və parlaq oxucular qoşulurdu.

İranə Qasımova şair, ssenarist, rejissor, Azərbaycan Yazıçılar Birliyinin üzvü, bir neçə şeir toplusu, pyes və poetik tamaşaların müəllifidir. O, təkcə Bakıda deyil, Moskvada, Sankt-Peterburqda, Tbilisidə, İstanbulda da solo şeir gecələri keçirib. O, “İranə Qasımova ilə açıq poeziya mikrofonu” layihəsi ilə yanaşı, “İranə Qasımova ilə poeziya klassikləri”, “İranə Qasımova ilə poeziya döyüşü” və “Azərbaycan şairləri İranə Qasımova ilə” layihələrinin müəllifi və təşkilatçısıdır.