Aprelin 25-də Bakı Şəhər Mədəniyyət Baş İdarəsinin tabeliyində olan Suraxanı rayon Heydər Əliyev Mərkəzinin,Suraxanı Rayon İcra Hakimiyyətinin, YAP Suraxanı rayon təşkilatının birgə təşkilatçılığı ilə akademik, görkəmli oftalmoloq-alim, Əməkdar elm xadimi Zərifə xanım Əliyevanın anadan olmasının 101-ci ildönümü münasibətilə “İki Ali Dəyəri Birləşdirən Müdrik Qadın” adlı tədbir keçirilib.

Tədbirdə rəsmilər, şəhid ailələri, rayonun səhiyyə və təhsil müəsissələrinin nümayəndələri iştirak ediblər.

İlk öncə Ümummilli lider Heydər Əliyevin xatirəsinə ucaldılmış abidəsi önünə gül dəstələri düzülüb.

Tədbir Ulu Öndər Heydər Əliyevin, Zərifə Əliyevanın və şəhidlərimizin əziz xatirələrinin bir dəqiqəlik sükutla yad edilməsilə başlanıb.

Sonra akademik Zərifə Əliyevanın həyatından bəhs edən videoçarx nümayiş olunub.

Çıxışçılar bildiriblər ki, Zərifə Əliyeva Azərbaycan oftalmologiya məktəbinə öz dəyərli töhfəsini verib, gənc kadrların hazırlanmasında geniş fəaliyyət göstərib. O, çoxsaylı fəxri adların, elmi titulların, mükafatların sahibidir.

Tədbir çərçivəsində həmçinin, göz müayinəsi aksiyası keçirilib. Aksiyada 100-dən artıq sakin 1 nömrəli Birləşmiş Uşaq Xəstəxanasının, 23 və 24 nömrəli Şəhər Poliklinikalarının oftalmoloqları tərəfindən müayinə olunublar.

Tədbirin bədii hissəsində  Xalq artistləri Gülyaz və Gülyanaq Məmmədovalar, Əməkdar artist Elçin Nağıyev, Gülarə Əliyeva adına 3 nömrəli Uşaq İncəsənət Məktəbinin “Dan Ulduzu” instrumental ansamblı, “Şiraz” qrupunun üzvləri çıxış ediblər.