Opera Studiyasının səhnəsində rejissor Hafiz Quliyevin quruluşunda “Arşın mal alan” operettasının premyerası olub. Tamaşa Fidan Hacıyevanın II Beynəlxalq Opera Festivalının açılış mərasimində baş tutub.

AZƏRTAC xəbər verir ki, tamaşada rolları gənc opera müğənniləri Aysu Əliyeva, Rauf Məmmədzadə, Röya Əliyeva, Şaxirə Rzayeva ifa ediblər. Cahan xala rolunu Azərbaycanın Xalq artisti Fidan Hacıyeva, Sultanbəy rolunu ölkənin Əməkdar artisti, opera teatrının solisti Fərid Əliyev, Vəli rolunu respublikanın Əməkdar artisti, opera teatrının artisti Tural Ağasıyev, Əsgər rolunu vokalçı, Yuğ teatrının aktyoru Vüqar Hacıyev ifa ediblər.

AZƏRTAC -ın müxbirinə müsahibəsində Opera festivalının təşkilatçısı, Xalq artisti Fidan Hacıyeva festivalın niyə “Arşın mal alan” operettası ilə açılmasına qərar verilməsindən danışıb.

“Bu il Üzeyir Hacıbəyliyə həsr olunub. Festivalı məhz bu dahi bəstəkarın əsəri ilə açmaq mənim üçün vacib idi. Tamaşada gənc opera müğənniləri, tələbələrim, mənim vokal məktəbimin tələbələri iştirak edirlər. Mən həmişə istəmişəm ki, tələbələrim mənimlə birlikdə çıxış etsinlər. Məqsədim gənc opera müğənnilərini və klassik ifaçıları böyük səhnələrə çıxarmaqdır. Bu, mənim missiyamdır. Məhz bu məqsədlə mən gənc istedadlıları, vokalçıları Opera Festivalında iştirak etməyə cəlb edirəm. Çalışdım ki, insanlar mümkün qədər çoxlu yeni səslər eşitsinlər, yeni adlar öyrənsinlər”, - deyə həmsöhbətimiz vurğulayıb.

Xalq artisti onu da əlavə edib ki, bu tamaşa üçün artıq bir neçə dəfə dəvət alıb. Bu il “Arşın mal alan” İngiltərədə nümayiş etdiriləcək - mahnılar Azərbaycan dilində, personajların dialoqları isə ingilis dilində səslənəcək. Bundan əlavə, sentyabrın 18-də - Musiqi Günündə sənətçilər operettanı Naxçıvanda təqdim edəcəklər.

II Beynəlxalq Opera Festivalı aprelin 29-dək davam edəcək. Bu müddət ərzində paytaxtın müxtəlif məkanlarında tanınmış xarici və azərbaycanlı ifaçıların, o cümlədən gənc opera müğənnilərinin, eləcə də 6-16 yaş arası gənc istedadlıların iştirakı ilə konsertlər təşkil olunacaq.