Bakı Şəhər Mədəniyyət Baş İdarəsinin tabeliyində olan Yasamal rayon Heydər Əliyev Mərkəzinin və  Yasamal rayon İcra  Hakimiyyəti Vətən müharibəsi  iştirakçıları və şəhid ailələri ilə işin təşkili şöbəsinin birgə təşkilatçılığı ilə 27 Sentyabr-Anım Gününə həsr olunmuş  “İgid vətən övladları" adlı tədbir keçirilib.

Tədbirdə rəsmilər, qazilər, Vətən müharibəsi iştirakçıları, Xüsusi Təyinatlı Qüvvələrin komandirləri , Bakı Dövlət Rabitə və Nəqliyyat Kollecinin,  Azərbaycan Dövlət Pedaqoji Kollecinin tələbələri iştirak ediblər.

İştirakçılar öncə Mərkəzin ekspozisiya zalında Ulu Öndər Heydər Əliyevin dövlətçilik fəaliyyətini əks etdirən eksponatlarla tanış olublar.

İlk olaraq Azərbaycan Respublikasının Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad edilib.

Tədbirdə “27 sentyabr -Tarixi ədalətin bərpası və qəhrəmanlıq səlnaməsi” mövuzusunda məruzə dinlənilib. Ardınca Anım Gününə həsr olunmuş videoçarx nümayiş olunub.

Çıxışlarda Ali Baş Komandan, Prezident İlham Əliyevin rəhbərliyi ilə başlanan  44 günlük Vətən müharibəsindən ətraflı söz açaraq bildiriblər ki, biz şəhidlərin xatirəsi qarşısında baş əyirik, onların qəhrəmanlığından güc alırıq. Onların fədakarlığı sayəsində Azərbaycan öz ərazi bütövlüyünü təmin edib, öz tarixi torpaqlarını düşmən tapdağından azad edib.

Vətən müharibəsinin iştirakçıları çıxış edərək keçdikləri şərəfli döyüş yolundan bəhs edərək, öz xatirələrini gənclərlə bölüşüblər. Qeyd ediblər ki, belə tədbirlər şəhidlərimizin ruhuna ehtiram, ailələrinə mənəvi dəstək göstərmək və gənclərin qəhrəmanlarımızı daha yaxından tanıması, vətənpərvərlik ruhunda tərbiyəsi baxımından mühüm əhəmiyyət kəsb edir.