Bakı Şəhər Mədəniyyət Baş İdarəsinin tabeliyində olan Suraxanı rayon Heydər Əliyev Mərkəzində “Konstitusiya və Suverenlik İli” çərçivəsində “Hüquqi dövlət, suveren ölkə” adlı dəyirmi masa keçirilib.

Tədbirdə rəsmilər, rayon təhsil müəssisələrinin nümayəndələri iştirak ediblər.

Çıxış edənlər bildiriblər ki, Ordumuz Müzəffər Ali Baş Komandan cənab İlham Əliyevin göstərişi ilə torpaqlarımızı düşməndən azad edib. Şəhidlərimizin qanı bahasına başa gələn bu azadlığımız qürurumuz olub. Bu gün Azərbaycan ərazi bütövlüyünü bərpa edərək dünyaya öz sözünü deyən qüdrətli ölkəyə çevrilib.

Dəyirmi masada qeyd edilib ki, 2020-ci il sentyabrın 27-də başlayan Vətən müharibəsi nəticəsində Azərbaycan Silahlı Qüvvələri Ermənistan ordusunu darmadağın edib və tarixi Zəfər qazanıb. Xalqımızın həyatında müstəsna əhəmiyyət kəsb edən bu möhtəşəm Zəfər sayəsində Azərbaycanın şanlı Dövlət Bayrağı suverenliyimizin bərqərar olduğu bütün ərazilərdə əzamətlə dalğalanmaqdadır.

Sonda iştirakçılar Ümummilli Lider Heydər Əliyevin zəngin irsini əks etdirən ekspozisiya ilə tanış olublar.